Ikipe ya Olympique Lyonnais yo mu Bufaransa yamanuwe mu cyiciro cya kabiri cya shampiyona y’iki gihugu kubera ibibazo by’imari .
Lyonnais yavanwe mu cyiciro cya mbere cya shampiyona y’Ubufaransa [ Ligue 1] ishyirwa mu cyiciro cya kabiri kizwi nka [Ligue 2] kubera ko ubukungu bwayo butifashe neza byanatumye iyi kipe ibura ubushobozi bwo kwishyura imyenda yayo yakomotse ku mikoreshereze y’imari idasobanutse .
Uyu mwanzuro wemejwe n’Akanama Kagenzura Imari z’Amakipe y’Umupira w’Amaguru mu gihugu cy’Ubufaransa [ DNCG] nyuma yuko bamwe mu bagize ubuyobozi bukuru bw’iyi kipe barimo na nyirayo, John Textor bari bamaze gutanga ubwiregure budafite ishingiro ku bijyanye no kugaragaza ibimenyetso bifatika byemeza ko ikibazo cy’imari cyakemutse .
M’Ukwakira ko mu mwaka ushize , nibwo aka kanama kari kageneye iyi kipe igihano ariko gasigira ubuyobozi bwayo umwanya uhagije wo gukusanya ubusobanuro bwashoboraga no kuvanaho iki cyemezo .
Icyo gihe sosiyete yitwa Eagle Football Club yari ifite hafi ya 77 % by’imigabane muri iyi kipe yahise yemeza ko Lyon ifite ideni ry’akabakaba miliyoni 422 z’amapawundi .
Nubwo bitari bihagije ngo igirirwe imbabazi ntimanurwe , Lyon yari yaragerageje gukusanya amafaranga binyuze mu kugurisha abakinnyi barimo Ryan Cherki wagiye muri Man City na Maxence Caqueret ndetse inasezerera bamwe mu bafatwaga nk’inyenyeri banafataga agatubutse barimo Alexandre Lacazzete na Antony Lopez .
Kurundi ruhande kandi ,biravugwa ko iki cyemezo cyafatiwe Lyon gishobora no kuzagira inkurikizi nziza ku ikipe ya Crystal Palace yo mu Bwongereza nayo ifitwe na Textor nubwo ku wa mbere yashyize umukono ku masezerano yo kugurisha imigabane ingana na 43% umuherwe Woody Johnson usanzwe ari nyir’ikipe ya New York Jets ikina muri NBA .
Mu busanzwe amategeko y’Impuzamashyirahamwe y’Umupira w’Amaguru ku Mugabane w’Uburayi [UEFA] ntago yemerera amakipe abiri cyangwa arenze afite ba nyirayo bamwe gukina irushanwa rimwe ryo ku mugabane amwe kandi ikipe ya Crystal Palace yari yarabonye itike yo gukina Europa League nyuma yo gutwara FA Cup itsinze Man City ndetse na Lyon nayo yari yarabonye iyi tike kuko yari yaraje ku mwanya wa gatandatu muri Ligue 1 mu mwaka ushize .
Mu mwaka wo mu 1989 nibwo Lyon yaherukaga gukina icyiciro cya kabiri mu Bufaransa ,ifite shampiyona 7 yatwaye hagati ya 2002 na 2008 ndetse kure yageze ruhando nyaburayi ni muri 1/2 cya UEFA Champions League mu mwaka wa 2020 .
Ivomo : BBC, Team Talk na The Independent .
Jimmy Gatete is a dynamic, Multi-skilled journalist with a broad expertise spanning sports, politics, and international affairs.
