Abatavuga rumwe n’ubutegetsi buriho mu gihugu cya Tanzania basabye leta gukuraho icyemezo cyafashwe cyo guhagarika by’agateganyo ibikorwa bya politiki by’ishyaka ,CHADEMA risanzwe rizwiho kutavuga rumwe n’ubuyobozi buriho .
Mu itangazo ryashyizwe ahagaragara n’ihuriro ry’abayobozi baharanira impinduka muri iki gihugu rya Pan African Progressive Leader’s Solidarity Network ku munsi wejo tariki ya 13 Kamena 2025 , risaba leta ya Tanzania kuvanaho iki cyemezo cyafashwe kuko gikomeje kubangamira ibikorwa bya buri munsi by’uyu mutwe wa politiki ndetse bikananiga ubwisanzure n’ukwishyira ukwizana kw’abatavuga rumwe n’ubutegetsi muri iki gihugu .
Ku itariki ya 10 Kamena nibwo urukiko rukuru rwa Dar es Salaam rwahaye umugisha icyemezo cyo guhagarika ibikorwa bya CHADEMA mu gihe kinga n’iminsi 14 .
Iri huriro kandi ryanasabye leta kuvanaho iki cyemezo gifatwa nk’igikorwa cyo kugaragaza igitugu no gusubiza inyuma demokarasi mu maguru mashya ndetse ibi bigomba no kujyana n’irekurwa ry’imfungwa za politike zirimo n’ impirimbanyi yo kurwanya ruswa akaba n’umurwanyashyaka waryo bwana Tundu Antiphas Mughwai Lissu uherutse gutabwa muri yombi .
Mu gihe iki gihugu gikomeje kuza mu myanya yo hafi mu biherereye ku mugabane w’Afurika bihonyora ubwisanzure n’amahame mpuzamahanga agenga iyubahirizwa ry’uburenganzira bw’ikiremwamuntu ; iri huriro ry’abatavuga rumwe na politike ya Tanzania ryanasabye imiryango mpuzamahanga iharanira uburenganzira bwa muntu gushyira ijisho ku migirire n’imigenzereze ya leta ya Tanzania ku kubariza ihame ry’ubwisanzure mu bya politike .
Aba batavuga rumwe n’ubutegetsi kandi basabye iyi miryango mpuzamahanga gukoresha ibihano ku bayobozi bakuru b’iki gihugu baba baragize uruhare mu inkubiri y’ihohoterwa ry’uburenganzira bwa muntu imaze igihe muri iki gihugu ndetse no gushyigikira ubwisanzure mu bya politike bw’imiryango itegamiye kuri leta .
Bamwe mu bacungira hafi ibya politiki yo mu karere bemeza ko uku gusubira inyuma mu bijyanye n’ubwisanzure mu bya politike kuvugwa n’aba batavuga rumwe n’ubutegetsi kwagiye kugira ingaruka mbi mu iterambere ry’intego ry’Umuryango w’Afurika y’Uburasirazuba washinzwe ku mahame y’imiyoborere myiza ,ubuyobozi bushingiye ku iyubahirizwa ry’amategeko no kwishyira ukwizana .
Igihugu cya Tanzania giherereye mu burasirazuba bw’u Rwanda kikaba gifite ubuso bwa kilometero kare 947,300 aho gituwe n’abarenga miliyoni 66 .62 .
Jimmy Gatete is a dynamic, Multi-skilled journalist with a broad expertise spanning sports, politics, and international affairs.
