Komite Nyobozi y’Ihuriro ry’Abafana b’Ikipe y’Igihugu y’u Rwanda izwi nka Amavubi yafashe icyemezo cyo guhagarika by’agateganyo Muhawenimana Claude ku nshingano zo kuyibera Perezida, imushinja kunyereza amafaranga yari agenewe abafana.
Iki cyemezo cyatangajwe ku wa 14 Mata 2026, nyuma y’imikino ya FIFA Series yabereye mu Rwanda. Biravugwa ko amafaranga agera kuri miliyoni eshatu z’amafaranga y’u Rwanda yari yatanzwe ngo afashe abafana muri iyo mikino, ariko ntiyigeze abageraho, ndetse ntiyanashyizwe kuri konti y’ihuriro nk’uko amategeko abiteganya.
Abagize Komite Nyobozi bamaze gufata uyu mwanzuro, bahise bandikira Muhawenimana bamumenyesha ko ahagaritswe, banamenyesha FERWAFA, ishyirahamwe ry’umupira w’amaguru mu Rwanda.
Iki cyemezo cyafashwe nyuma y’inama zitandukanye zabaye mu ntangiriro za Mata 2026, zigamije gusuzuma imyitwarire ye. Gusa, uyu muyobozi ntiyigeze yitabira izo nama ngo atange ibisobanuro, n’ubwo yari yaratumiwe inshuro nyinshi.
Umwanzuro wo kumuhagarika wanagejejweho n’umuhesha w’inkiko, wamugejejeho inyandiko ibimumenyesha binyuze ku rubuga rwa WhatsApp. Iyi nyandiko yashyizweho umukono n’abayobozi batandukanye muri Komite Nyobozi, barimo Visi Perezida, Umubitsi n’abashinzwe izindi nshingano zitandukanye.
Uretse icyo cyaha cyo kunyereza amafaranga, Komite inamushinja andi makosa arimo kudakorera mu mucyo, aho bavuga ko yajyaga yitwaza izina rye bwite aho guhagararira abafana bose mu biganiro yagiranaga na FERWAFA. Banamushinja kandi gutanga konti ze bwite mu kwakira inkunga z’abafana, aho gukoresha iz’ihuriro, ndetse no kutajya atumiza inama zo gutanga raporo y’ibikorwa nk’uko byari bikenewe.
Nubwo ibi byose ashinjwa, Muhawenimana Claude yabihakanye, avuga ko abamuhagaritse batabifitiye ububasha bwo kubikora. Asanzwe kandi ari umwe mu bayobozi b’ihuriro ry’abafana b’ikipe ya Rayon Sports FC ku rwego rw’igihugu.
Iki kibazo kiracyari gukurikiranwa, mu gihe hategerejwe kureba icyemezo cya nyuma kizafatwa ku hazaza h’ubuyobozi bw’ihuriro ry’abafana b’Amavubi.
