Mu butumwa Micky yanyujije ku mbuga nkoranyambaga ze yatangaje ko atigeze yifuza ko hari uwajya mu bibazo kubera we cyangwa ngo afungwe ariko ko ngo igihe kigeze. Muri iyi nkuru tugiye kukugezaho ibaruwa ye uko yakabaye.
Micky yanditse ati:"Kuva mu mwaka wa 2024 kugeza ubu mu mwaka wa 2026, maze igihe kinini ngerageza kwihangana no kwirinda kugira uwo nashyira mu bibazo. Nta na rimwe nigeze nifuza ko umuntu afungwa cyangwa ko ubuzima bwe bwangirika kubera ikibazo dufitanye.
Nzi neza ko iyo abantu bafitanye ikibazo, umwe ashobora kubabara, kurakara cyangwa kutongera gukunda undi. Ibyo ndabyumva kandi nabyubahirije. Ariko ntekereza ko ikibazo abantu bafitanye kidakwiye kurenga imipaka ngo kigere ku bana, ku muryango cyangwa ku buzima bw'umuntu ku giti cye.
Narihanganye cyane. Hari amagambo menshi numvise, ibintu byinshi nabonye n'ibikorwa byinshi nagerageje kwirengagiza, nibwira ko igihe kizagera ibintu bikarangira. Nakomeje guceceka kuko ntifuzaga amakimbirane cyangwa gukomeza kongera ikibazo. Ariko uko igihe cyagiye gihita, ibintu byakomeje gukura no kurenga ku byo nashoboraga kwihanganira. Byageze n'aho ikibazo kigera ku bana banjye, kandi aho ni ho nabonye ko ntakwiye gukomeza guceceka.
Umuntu ashobora kwihanganira byinshi iyo ikibazo kiri hagati ye n'undi muntu. Ariko iyo bigeze ku bana n'umuryango, umuntu agomba gufata ingamba zo kubarinda no gushaka ubufasha bw'inzego zibifitiye ububasha.Ni yo mpamvu nahisemo gufata inzira y'amategeko. Icyemezo cyo gutanga ikirego sinagifashe mu burakari, mu kwihorera cyangwa mu rwango.
Nabitekerejeho igihe kirekire, ngerageza uburyo bwo kwihangana no kwirinda amakimbirane, ariko ngeze aho mbona ko kwihangana kwanjye kutagihagije.
Nizera ko Rwanda Investigation Bureau (RIB) izumva ikibazo cyanjye, igasuzuma ibimenyetso bihari kandi ikagikurikiranira mu mucyo no mu buryo bukurikije amategeko.
Icyo nsaba si ukwihorera cyangwa kugirira umuntu nabi. Icyo nsaba ni uko ukuri kumenyekana, uburenganzira bw'abagize umuryango wanjye bukubahirizwa, kandi niba hari icyaha cyarakozwe, kigakurikiranwa hakurikijwe amategeko.
Narihanganye bihagije. Nagerageje kwirinda amakimbirane bihagije. Ariko ubu nahisemo kureka inzego zibifitiye ububasha zikabikurikirana. Nizeye ubutabera kandi nizeye ko ikibazo cyanjye kizafatwa mu buryo bukwiye, nta rwango cyangwa kwihorera, ahubwo hakurikijwe ukuri, ibimenyetso n'amategeko".
