Umunyabigwi mu mupira w'amaguru w'u Butaliyani, Franco Baresi, wubatse amateka akomeye muri AC Milan no mu Ikipe y'Igihugu y'u Butaliyani, yitabye Imana ku myaka 66 nyuma y'igihe kirekire arwaye indwara y'ibihaha.
Urupfu rwe rwatangajwe kuri uyu wa Gatanu, tariki ya 31 Nyakanga 2026, n'ikipe ya AC Milan, yamusobanuye nk'umwe mu bantu bagize uruhare rukomeye mu mateka yayo ndetse wanagaragaje ubudahemuka budasanzwe.
Mu itangazo yashyize ahagaragara, AC Milan yagize iti: "Umuryango wa AC Milan wose uri mu gahinda nyuma y'urupfu rwa Franco Baresi. Urugero rwe rwiza, ubudahemuka n'ibyo yakoreye iyi kipe bizahora mu mitima yacu, nk'uko yabikoze yambaye umwambaro wa nimero gatandatu."
Franco Baresi yakiniye AC Milan imyaka 20 yose y'ubuzima bwe bw'umupira, aba umwe mu bakinnyi bakomeye iyi kipe yagize. Yanabaye kapiteni wayo mu gihe cy'imyaka 15, ayifasha kwegukana ibikombe bitandatu bya Shampiyona y'u Butaliyani (Serie A) n'ibikombe bitatu by'i Burayi.
Yanabaye umwe mu nkingi z'Ikipe y'Igihugu y'u Butaliyani hagati ya 1980 na 1990, aho yubatse izina nk'umwe mu ba myugariro beza babayeho mu mateka ya ruhago.
Mu 2025, ubwo yari Visi Perezida w'Icyubahiro wa AC Milan, yabazwe imiyoboro ijyana umwuka mu bihaha, nyuma atangira gukurikiranwa n'abaganga bavura kanseri.
Muri Gashyantare 2026 yari yongeye kugaragara mu ruhame ubwo yatambagizaga Urumuri rw'Imikino Olempike yo mu Itumba ya Milan Cortina, ari kumwe na mugenzi we bakinanye, Giuseppe Bergomi.
Nyuma yo gusezera gukina umupira mu 1997, AC Milan yafashe icyemezo cyo kubika burundu nimero 6 yambaraga, mu rwego rwo kumuha icyubahiro no kuzirikana uruhare rwe rukomeye mu mateka y'iyi kipe.
Urupfu rwa Franco Baresi rusize icyuho gikomeye mu muryango wa AC Milan, mu mupira w'amaguru w'u Butaliyani no ku bakunzi ba ruhago ku isi yose.
