Umutoza w’Ikipe y’Igihugu ya Repubulika Iharanira Demokarasi ya Congo (RDC), Sébastien Desabre, yavuze ko yemeye gutsindwa na Uganda, ashimangira ko umukino wa gicuti wabahuje wari ugamije cyane kureba ubushobozi bw’abakinnyi bashya bahamagawe mu ikipe y’Igihugu.
DRC yatsinzwe na Uganda Cranes ibitego 2-0 mu mukino wa gicuti wabereye i Johannesburg muri Afurika y’Epfo ku wa Gatanu tariki ya 2 Ukwakira 2026.
Nyuma y’umukino, Desabre yavuze ko abakinnyi n’abatoza bagomba kwakira ibyavuye mu mukino, bakagaruka mu myitozo bafite intego yo kunoza ibyo batakoze neza. Ati: “Turemera ko twatsinzwe, kuko kwemera gutsindwa ni ingenzi. Turasubira mu kazi kandi tuzagaruka ku wa Mbere twizeye ko tuzaba twarushijeho kuba beza.”
Desabre yavuze ko intego nyamukuru y’uyu mukino itari ugutsinda Uganda, ahubwo yari ukureba uko abakinnyi bashya bahamagawe mu Ikipe y’Igihugu bitwara.
Yasabye ko aba bakinnyi bakiri bato bagirwa inama kandi bagahabwa umwanya wo kumenyera gukina ku rwego mpuzamahanga.
Ati: “Aba ni abakinnyi bashya, ni ubwa mbere bamwe muri bo bakiniye muri Afurika, kandi ni na bo bakiri bato kurusha abandi. Tugomba gutuza kugira ngo twitegure umukino utaha.”
Desabre yavuze ko nyuma y’iyi mikino bazafata imyanzuro ku bakinnyi bazitabira imikino iteganyijwe mu Gushyingo, ashimangira ko DR Congo ifite ikipe ikomeye n’abakinnyi benshi bashoboye.
N’ubwo yavuze ko intego nyamukuru yari ugusuzuma abakinnyi, Desabre yemeye ko atishimiye uko ikipe ye yitwaye muri uyu mukino.
Ati: “Biragaragara ko ugereranyije n’uko twashoboye gukina uyu munsi, atari byo twari twiteze. Hazaba undi mukino, tuzareba niba bamwe mu bakinnyi bazamura urwego rw’imikinire.”
Umutoza w’Abanyekongo yavuze ko yizeye ko mu mukino wa kabiri, abakinnyi bashya bazagaragaza ubushobozi bwabo. RDC yatsinzwe na Uganda ibitego 2-0 mu mukino wa mbere wabereye i Johannesburg ku wa 2 Ukwakira 2026.
Umukino wa kabiri w’iyi mikino ibiri ya gicuti uteganyijwe ku wa Mbere tariki ya 5 Ukwakira 2026.
Desabre yavuze ko nyuma y’iyi mikino, abatoza bazasesengura ibyabaye muri iyi gahunda y’imyitozo, mbere yo gutangaza urutonde rw’abakinnyi bazitabira imikino mu Gushyingo mu gushaka itike y’igikombe cya Afurika cya 2027.
