Mu magambo akomeye, Umuraperi Papa Cyangwe yasobanuye Impamvu we n'abaraperi bari bakoranye indirimbo bise "Reka Mbeho", bayisibye ku mbuga nkoranyambaga zose zicururizwaho umuziki.
Mu kiganiro Umuraperi Papa Cyangwe yagiranye na Televiziyo Isibo by'umwihariko mu kiganiro cy'Imyidagaduro cya The Choice Live, yavuze ko indirimbo ye "Reka Mbeho " n'abandi baraperi bari bayihuriyemo bafashe umwanzuro wo kuyisiba ku mbuga nkoranyambaga zabo zose kugirango bitandukanye n'abari batangiye kuyikoresha nabi.
Mu magambo ya Papa Cyangwe, yagaragaje ko ba babajwe no kumva indirimbo nziza bari bakoreye abakunzi babo, itangiye gukoreshwa n'abantu bakunze kwitwa 'inyangarwanda' (Kubera kuvuga nabi u Rwanda n'abayobozi barwo) mu nyungu zitubaka, bityo bahitamo kuyisiba mu buryo bwo guca intege abanzi b'Igihugu bari batangiye kuyifashisha mu bikorwa bibi byabo.
Papa Cyangwe yagize ati:"Ibyo bicucu byayihinduriye ubusobanuro, indirimbo yari nziza biyikoresha mu nyungu zabyo" ariko tuzakora izindi nziza kuko dufite ibyiza byo gutanga ku bakunzi bacu. Ibyo 'bigarasha' bizakore izabyo twe twabonye tutagikeneye indirimbo iri kwifashishwa n'abanzi".
Uyu muraperi uri mu bagezweho mu Rwanda kandi yavuze ko ahari kandi na bagenzi be bari bakoranye bahari, bityo nibabona neza umwanya bazongera guhura bagakora ibindi bikorwa byiza.
Indirimbo 'Reka Mbeho' yasohotse mu ntangiro za Nzeri 2026, irimo Abaraperi barimo Papa Cyangwe,Riderman, Bulldog,Juno Kizigenza na Ish Kevin irakundwa cyane cyakora iza gukurwa ku mbuga zicuruzizwaho Umuziki, nyuma yo Kubona iri kwifashishwa n'abanzi b'u Rwanda mu nyungu zabo.
Papa Cyangwe ari mu myiteguro yo gushyira hanze Alubumu ye Nshya yise Never Broke Again ndetse aherutse kuyisogongeza abakunzi be, mu birori byitabiriwe n'abahanzi barimo Ish Kevin.
Iyi Alubumu ya Papa Cyangwe izumvikanaho abahanzi bakomeye mu muziki w'u Rwanda nka Ish Kevin, Racine,Bushali,Yampano n'abandi benshi.
