Umuhanzikazi ukiri muto wo mu Buyapani, Hirata Runa, wari umwe mu bana batorezwaga mu itsinda ry’abakobwa bakora umuziki rya DIANNA Project, yapfuye afite imyaka umunani (8) y’amavuko.
Ikigo cyamurebereraga inyungu cyatangaje ko Runa yapfuye azize ‘Myocarditis’, indwara itera kubyimba kw’imikaya y’umutima iterwa no nyuma n’ibicurane (influenza).
Mu itangazo ryashyizwe hanze ku wa 28 Nzeri 2026, ikigo cya DIANNA Project cyavuze ko Runa “yitabye Imana azize myocarditis yatewe n’ibicurane.” Iki kigo cyashimiye abakunzi b’uyu mwana ndetse n’abandi bose bagize uruhare mu kumushyigikira mu gihe yari akiriho.
Urupfu rwa Runa rwababaje abakunzi be kuko yari akiri muto kandi yari amaze kugaragara ku rubyiniro mbere gato y’uko apfa. Ku wa 20 Nzeri, Runa yari yitabiriye igitaramo, hasigaye iminsi itanu ngo apfe, nk’uko ikinyamakuru The Standard cyabitangaje.
Nyuma y’icyo gitaramo, yifashishije ifoto ye ari kumwenyera yashyize ubutumwa kuri X agira ati: “Mwakoze ku bw’uyu munsi. Ndabashimira. Byari bishimishije cyane.”
Ikigo cya DIANNA Project cyasabye abafana n’abandi bantu kubaha umuryango wa Runa muri iki gihe cy’akababaro. Mu itangazo ryacyo, cyasabye abantu kwirinda guhamagara umuryango, kubasaba ibiganiro cyangwa kubaza ibibazo ku mbuga nkoranyambaga bijyanye n’urupfu rwe.
Umuryango wa Runa kandi watangaje ko gusezera no gushyingura byabaye mu buryo bwihariye, haterana gusa abo mu muryango wa hafi n’inshuti za hafi. Nyuma y’urupfu rwe, abavandimwe ba Runa bavuze ko bifuza ko abakunzi be bamwibuka nk’umwana wari ufite inzozi zo kuba umuhanzi.
Bagize bati: “Kimwe cya gatatu cy’ubuzima bwa Runa yakimaze ari umuhanzi. Turabasaba ko mukomeza kumubika mu mitima yanyu nk’umuhanzi w’ibihe byose.”
Umuryango kandi washimiye abandi bahanzi bagenzi ba Runa bamugaragarije ineza, abafana bamushyigikiye, abakozi b’ikigo cyamurebereraga ndetse n’abandi bose bagize uruhare mu buzima bwe.
