Ibigo by’amashuri bigera kuri 400 mu Bufaransa byitezwe gukomeza gufunga kuri uyu wa Gatanu, nyuma y’uko imyigaragambyo y’abanyeshuri yamagana ibibazo biri mu burezi ikomeje mu bice bitandukanye by’Igihugu.
Iyi myigaragambyo yatangiriye mu nkengero za Paris, aho abanyeshuri bagaragazaga impungenge ku buke bw’abarimu, ubwinshi bw’abanyeshuri mu mashuri ndetse n’inyubako z’amashuri zishaje kandi zidakwiye nk’uko babivuga.
Minisitiri w’Ubutabera, Gérald Darmanin, yavuze ko kuva imyigaragambyo yatangira abantu bagera ku 2,000 bamaze gutabwa muri yombi, hafi bibiri bya gatatu bakaba barashyizwe mu maboko ya polisi kugira ngo bakorerwe iperereza.
Darmanin yavuze ko hari itsinda ry’abantu bagira uruhare mu bikorwa by’urugomo, kandi ko hari impungenge ko bamwe muri bo bashobora kuba batari abanyeshuri bo mu mashuri yisumbuye. Yagize ati: “Twatangiye tubona imyigaragambyo y’abanyeshuri bo mu mashuri yisumbuye, ariko ubu byahindutse ikibazo cy’umutekano rusange.”
Yongeyeho ko igihe abantu batangiye kwibasira imodoka zitwara abagenzi cyangwa bagatwika amashuri, ikibazo kiba cyarenze ku myigaragambyo isanzwe. Minisitiri w’Uburezi, Edouard Geffray, yavuze ko amashuri n’ibindi bigo by’uburezi birenga 400 bitarafungura kuri uyu wa Gatanu kubera impungenge z’umutekano.
Guverinoma yasabye ko mu gihe amashuri adashobora kwakira abanyeshuri mu buryo butekanye, amasomo ashobora gukomeza hifashishijwe uburyo bw’ikoranabuhanga.
Kuva imyigaragambyo yatangira, abantu benshi barakomeretse, barimo abanyeshuri n’abakozi b’amashuri. Ku wa Gatatu gusa, abantu barenga 1,000 bari bafashwe na polisi mu bikorwa bifitanye isano n’imyigaragambyo, nk’uko abayobozi babitangaje.
Mu mujyi wa Marseille, abantu babiri bakora mu ishuri rya Victor Hugo basutsweho lisansi mu buryo butari bugambiriwe ubwo umunyeshuri yageragezaga kujugunya lisansi mu muhanda.
Muri Strasbourg, imodoka yatwitswe, mu gihe muri Toulouse polisi ishinzwe guhangana n’imvururu yahanganye n’urubyiruko rwari mu myigaragambyo. Hari kandi ishuri ryahiye muri Nantes, mu gihe irindi ryo muri Le Havre ryangijwe n’umuriro. Muri Saint-Denis, mu nkengero za Paris, polisi yarwanye n’abari mu myigaragambyo, hakoreshejwe ibyuka biryana mu maso ndetse n’ibindi bikoresho byo guhangana n’imvururu.
Amakuru avuga ko imyigaragambyo yaba yaratangijwe n’abanyapolitiki batavuga rumwe na Leta, barimo bamwe mu bagize ishyaka La France Insoumise (LFI). Umudepite wa LFI, Louis Boyard, yahakanye ibyo birego, avuga ko ishyaka rye rishyigikira imyigaragambyo itarimo urugomo.
Abanyeshuri bavuga ko bafite ibibazo birimo kubura abarimu, ibyumba by’amashuri byuzuye, inyubako zishaje, ubushyuhe bukabije mu byumba ndetse n’amasaha menshi y’amasomo. Minisitiri w’Uburezi yavuze ko agiye kuganira n’abahagarariye abarimu, ababyeyi n’abanyeshuri kugira ngo ibibazo byabo bisuzumwe.
Perezida Emmanuel Macron na we yavuze ko yumva impungenge z’urubyiruko, ariko ashimangira ko ibibazo biri mu burezi bitagomba kuba impamvu yo gukora ibikorwa by’urugomo.
Guverinoma ikomeje gushaka uburyo bwo guhuza abanyeshuri n’abayobozi mu burezi, mu gihe imyigaragambyo imaze gukwira mu bice byinshi by’u Bufaransa kandi ikomeje kugira ingaruka ku mikorere y’amashuri.
