Igihugu cya Taiwan cyakiriye indege ebyiri za mbere z’intambara zo mu bwoko bwa F-16V Block 70 zakorewe muri Leta Zunze Ubumwe za Amerika, mu gihe iki Gihugu gikomeje kuvugurura ubushobozi bw’ingabo zacyo mu rwego rwo guhangana n’ingaruka z’umutekano.
Izi ndege bazihawe mu masezerano y’agaciro ka miliyari 8 z’amadolari ya Amerika, agamije kugeza muri Taiwan indege 66 za F-16V. Amasezerano yashyizweho umukono muri 2019, kandi izi ndege zari ziteganyijwe gutangira kugera muri Taiwan muri uyu mwaka.
Indege ebyiri zakozwe na sosiyete yo muri Amerika Lockheed Martin zageze ku kibuga cy’indege cya Chihhang, i Taitung mu burasirazuba bwa Taiwan, ku wa Gatanu tariki ya 2 Ukwakira 2026.
Zari zaranyuze muri Hawaii na Guam, amakuru akuga ko zatinze kugera muri Taiwan. Raporo zerekanye ko hari ibibazo birimo ibijyanye na porogaramu z’ikoranabuhanga byagize uruhare mu gutinza gahunda yo kuzitanga.
Minisitiri w’Ingabo wa Taiwan, Wellington Koo, yavuze ko izindi F-16V zizakomeza kugera muri Taiwan mbere y’uko uyu mwaka urangira, nubwo atatangaje umubare w’izizahagera.
Ati: “Ntabwo izi ebyiri ari zo zonyine zizaba zageze hano mbere y’uko umwaka urangira.” F-16V ni indege y’intambara ikora ibikorwa byinshi, ifite ibyuma by’ikoranabuhanga bigezweho, radar n’ubushobozi bwo gukoresha intwaro zigezweho.
Izi ndege ziziyongera ku zindi F-16 Taiwan isanzwe ifite, ndetse gahunda yo kuvugurura indege za F-16A/B zari zisanzwe muri iki gihugu yarangiye mu 2023. Iyo gahunda nshya izatuma umubare w’indege za F-16 za Taiwan urenga 200 igihe indege 66 zose zizaba zimaze gutangwa na Amerika.
Umuhanga mu bya gisirikare Su Tzu-yun yavuze ko F-16V zizongera ubushobozi bw’Ingabo zirwanira mu kirere za Taiwan mu guhangana n’indege z’Ingabo z’u Bushinwa bakunze gukozanyaho.Uku kwakira F-16V kwabaye mu gihe Taiwan igitegereje icyemezo cya Washington ku yindi gahunda y’intwaro ifite agaciro ka hafi miliyari 14 z’amadolari.
Perezida wa Amerika, Donald Trump, yavuze ko iyo gahunda ayihagaritse by’agateganyo. Muri iyo ntwaro harimo na sisitemu za Patriot zo kurinda ikirere. Trump yari yavuze ko iyo gahunda ishobora kuba uburyo bwiza bwo kuganira n’u Bushinwa ku bibazo bireba Taiwan n’impamvu ituma barwana.
Ubushinwa buvuga ko Taiwan ari igice cy’ubutaka bwabwo kandi bwakunze gusaba Amerika guhagarika guha Taiwan intwaro.
Taiwan, ku ruhande rwayo, ihakana ko Beijing ari yo ifite ububasha kuri icyo kirwa, mu gihe Amerika ikomeza kuvuga ko ifite inshingano zishingiye ku mategeko zo gufasha Taiwan kugira ubushobozi bwo kwirwanaho.
