Sanga:
APR BBC ikomeje kwitegura imikino ya BAL 2026 yaguze Umunyamerika Quinn Cook wegukanye Shampiyona ya Basketball muri Leta Zunze Ubumwe za Amerika, NBA inshuro ebyiri. Quinn Cook biteganyijwe ko ashobora kuzagera i Kigali ku wa Gatatu, tariki ya 11 Werurwe 2026 agatangira kwitegurana n’abandi iri rushanwa rya mbere muri Afurika. Cook ni umwe mu bafite izina rizwi muri NBA kuko yegukanye Igikombe cya Shampiyona inshuro ebyiri, mu 2018 ari kumwe na Golden State Warriors no mu 2020 ari kumwe na Los Angeles Lakers. Uyu mukinnyi kandi yanyuze mu yandi makipe menshi nka Dallas Mavericks, New Orleans Pelicans na Cleveland Cavaliers. Quinn Cook yabaye mukinnyi yabaye umukinnyi wa kane iyi kipe yongeyemo nyuma ya Leonard Craig Randall n’Abanya-Sudani, Madut Akec na Mangok Mathiang. Biteganyijwe ko Ikipe y’Ingabo z'Igihugu izatangirira iri rushanwa muri Kalahari Conference iteganyijwe tariki ya 27 Werurwe 2026 i Pretoria muri Afurika y’Epfo. Umwaka ushize, APR BBC yegukanye umwanya wa gatatu muri iri rushanwa, aho ubu ubuyobozi butangaza ko bwifuza kwegukana iri rushanwa cyane ko imikino ya nyuma izabera i Kigali muri Gicurasi 2026.
