“Byankoze ku mutima cyane “ Rutahizamu Djibril Ouattara ku munsi asura Urwibutso rwa Jenoside

Rutahizamu wa APR FC ukomoka muri Burkina Faso, Cheikh Djibril Ouattara, yavuze ko yagizweho ingaruka zikomeye n’amarangamutima ubwo yasuraga Kigali Genocide Memorial akibonera amateka akomeye u Rwanda rwanyuzemo mu 1994.

Ouattara, wageze muri APR FC muri Mutarama 2025 avuye muri JS Kabylie, yavuze ko nyuma y’amezi icyenda mu Rwanda yafashe icyemezo cyo gusura uru rwibutso kugira ngo arusheho gusobanukirwa amateka y’igihugu akinamo.

Mu kiganiro yagiranye na IGIHE dukesha iyi nkuru, yagize ati: “Kuri njye byari uburyo bwo guha icyubahiro urwibutso basize.”

Yasobanuye ko nyuma y’urwo ruzinduko, yasangije inshuti ze ibyo yabonye, ashimangira akamaro ko kumenyekanisha amateka no kwigisha abandi ku ngaruka mbi z’urwango n’ivangura. Ati: “Ni ngombwa kumenyesha abandi, kubabwira amateka no gukangurira buri wese gutekereza ku ngaruka z’urwango n’ivangura.”

Uyu mukinnyi yavuze ko ku rwibutso rwa Gisozi yahabonye ubuhamya bukomeye, amafoto n’imva ziruhukiyemo imibiri y’ibihumbi by’Abatutsi, ibintu byamukoze ku mutima cyane.

Ati: “Nakozwe ku mutima cyane n’ibyo nabonye hariya, ariko na none nkomezwa n’umuhate w’u Rwanda. Nubwo cyanyuze mu mateka ashaririye, igihugu cyarongeye kirahagarara, cyubaka ubumwe ndetse gitera imbere gifite icyizere.”

Cheikh Djibril Ouattara yasabye abantu bose guharanira amahoro n’ubumwe, agaragaza ko siporo igomba kuba urubuga ruhuza abantu aho kubatandukanya.

Ati: “Siporo igomba kuba umwanya wo guhuza abantu, ikinyabupfura n’ubwiyunge. Muri iki gihe cyo kwibuka, ndahamagararira abakinnyi kwibuka no kubaka umuryango ufite ubumwe.”

Muri uyu mwaka w’imikino wa 2025/26, Ouattara ari mu bakinnyi bahagaze neza muri shampiyona y’u Rwanda aho amaze gutsinda ibitego 11 mu mikino 18, ari ku mwanya wa gatatu mu bamaze gutsinda byinshi.

Mu mwaka ushize, yagize uruhare rukomeye mu gufasha APR FC kwegukana Igikombe cya Shampiyona, icy’Amahoro ndetse n’icy’Intwari.

⬅⬆➡🗑

⬅⬆➡🗑

⬅⬆➡🗑

Rutahizamu wa APR FC