Umutoza w’umunya-Portugal Carlos Queiroz yagizwe umutoza mukuru w’Ikipe y’Igihugu ya Ghana, “Black Stars”, mu rwego rwo kuyitegura Igikombe cy’Isi cya 2026.
Ku wa Mbere, tariki ya 13 Mata 2026, ni bwo Ishyirahamwe ry’Umupira w’Amaguru muri Ghana ryatangaje ko ryamaze kubona umutoza mushya usimbura Otto Addo, wari umaze gutandukana n’iyi kipe kubera umusaruro muke.
Queiroz w’imyaka 73 afite ubunararibonye bukomeye mu mupira w’amaguru ku rwego mpuzamahanga. Yigeze gutoza Ikipe y’Igihugu ya Portugal ayigeza mu gikombe cy’Isi cya 2010 ikarenga amatsinda, ndetse anafasha South Africa kubona itike y’Igikombe cy’Isi cya 2002.
Yatoje kandi amakipe y’ibihugu atandukanye arimo Iran yayoboye mu Gikombe cy’Isi cya 2014 na 2018, ndetse n’ibindi bihugu nka Misiri, United Arab Emirates, Colombia, Oman, u Buyapani na Qatar.
Ku rwego rw’amakipe asanzwe, Queiroz yanyuze mu makipe akomeye arimo Real Madrid, Manchester United aho yabaye umwungiriza wa Alex Ferguson, ndetse na Sporting CP.
Igikombe cy’Isi cya 2026 kizabera muri United States, Canada na Mexico, kikazatangira tariki ya 11 Kamena kugeza ku ya 19 Nyakanga 2026.
Ghana iri mu itsinda L hamwe n’England, Panama na Croatia, aho izaba ishaka kwitwara neza iyobowe n’uyu mutoza mushya ufite ubunararibonye bukomeye.
