Abaturage
mu Mudugudu wa Kabuyekera , Akagari ka Burushya Umurenge wa Nyamyumba barasaba
kwimurwa aho batuye bagaragaza ko mu gihe cy’imvura barara hanze kubera gutinya
ko inzu zabo zabagwaho.
Abo baturage
bagaragaza ko batewe impungenge cyane n’ubwo bazima babayemo ku buryo bukomeye
bagasaba ko bafashwa kwimurwa aho hantu bagashakirwa ahandi.
Uwitwa
Mukamusoni Veronica yabwiye Imvaho Nshya ko bafashijwe bakwimurwa n’imiryango
yabo.
Yagize
ati:”Mu mwaka wa 2023 twahuye n’ibiza imvura yabaye nyinshi, izi nzu zose
zirasenyagurika. Tuamara igihe turi kuba hanze, twabimenyesheje ubuyobozi
baraza baradufotora, tubwirwa ko iyo imvura iguye yose ishirira mu nzu ndetse
n’uyu mukingo ubona ukorehereza itaka hano, badusezeranya ko bagiye kudufasha,
kuva ubwo ntabwo twongeye kubabona”.
Yakomeje
agira ati:”Imvura iherutse kugwa nanone, yamanuye uyu mukingo ukubita
ubwiherero VUP yari yanyubakiye igwa epfo inzu isigara iri guhubangana. Nabyo
narabivuze hagera abantu barafotora bambwira ko bazadufasha ariko ntibyaba”.
Undi
muturage witwa Triphina Murekatete na we yavuze ko bakimara guhura n’ibyo biza
bya 2023 , abo bayobozi babwiye ko bazabakurikirana nyuma ariko bagategereza
bagaheba.
Yagize
ati:”Muri icyo gihe, baratubwiye ngo bazabikurikirana nyuma, gusa twarategereje
tubura turaheba. Twageraga ku Murenge dusaba ko badukura hano bakatwimura
bakatubwira ngo tube turetse niba amazu agihagaze. Ikinteye impungenge ni uko
imvura n’igwa tuzamanuka mu gishanga kandi iyo iguye nta muntu uryama. Twese
tujya mu musozi kugira ngo tudatemba ubwo umunsi yadutunguye tuzahapfira”.
Yakomeje
agira ati:”Nta bushobozi dufite bwo kwiyimura aha ndetse twanashatse abantu
batuguranira cyangwa bahagura wenda ngo twijyane , uhageze akatubwira ko
atagura umurima uri aha hantu bikarangira gutyo ari yo mpamvu turi gusaba ko
Leta yadufasha”.
Undi mugabo uvuga ko hari umukingo umuri hejuru utuma ataryama yagize ati:”Ikintu kinteye impungenge ni uyu mukingo uriho ibiti undi hejuru n’umuryango wanjye. Mu gihe cya vuba imvura yaguye nagiye ku Kagari gusaba ko bambwirira nyiri ibyo biti akabikuraho bamubwiye atema kimwe ibindi arabireka avuga ko aribyo bikomeza umusozi.
Naciye imiferege imanura amazi ariko byabaye iby’ubusa. Icyo
tubona nk’igisubizo ni uko Leta yatugirira imbabazi ikadutabara ikadukura aha ahantu
tugakiza ubuzima bwacu n’ubwana bacu”.
