Umuturage witwa Jean de Dieu Duturanyembazi utuye mu Mudugudu wa Rusongati , Akagari ka Gisa, Umurenge wa Rugerero, arasaba ubufasha bwo kubakirwa inzu kuko iyo abayemo igiye kumugwaho n’umuryango we ndetse mu gihe cy’imvura bakaba barara bahagaze.
Umuturage
witwa Jean de Dieu Duturanyembazi utuye mu Mudugudu wa Rusongati , Akagari ka
Gisa, Umurenge wa Rugerero, arasaba ubufasha bwo kubakirwa inzu kuko iyo
abayemo igiye kumugwaho n’umuryango we ndetse mu gihe cy’imvura bakaba barara
bahagaze.
Avuga ko
ubuzima abayeho muri iyo nzu n’umuryango we , bumuhangayikishije kandi ko we
ubwe ntacyo abasha kwifasha akaba ariyo mpamvu asaba Leta kumufasha inzu ye ikubakwa.
Yagize
ati:”Ndasaba ubufasha bwo gusanura iyi nzu kuko isa n’aho ari hanze.
Naragerageje ngo ndebe ko nayisanurira ariko byarananiye pe, kubaka aha hagati,
gushyiraho amabi nabiburiye ubushobozi kuko mfite abana bajya kwiga barimo
n’impanga, nkagira n’umugore utagishoboye, mbese nko mu cyumweru nabona ikiraka
cy’amafaranga 1,500 Rwf tukayakoresha hano mu rugo nayo ntabe ahagije ubundi
tukabeshwaho n’abaturanyi”.
Yakomeje
agira ati:” Hano mbere hari inzu ya nyakatsi , Ubuyobozi buramfasha burayubaka,
none niyi bubatse nayo yarashaje, ndasaba ko bamfasha kuko iyo imvura iguye njye
n’umuryango wanjye turara twitwikije ibintu turi mu nguni kandi tukanagira
ubwoba ko isaha n’isaha yatugwaho”.
Jean de
Dieu Duturanyembazi wabaye imfubyi akiri muto, agasigara mu nzu ya nyakatsi
yaje kubakwa na Leta, avuga ko agorwa no gutunga abana bane b’impanga dore ko
ngo uko umugore we abyaye abyara impanga , kuri ubu akaba afite abana batandatu
barimo 2 bapfuye nabo bari baravutse ari impanga.
Agaragaza
ko kandi aramutse afashijwe, inzu ye ikubakwa yakomeza gushaka uko yiteza
imbere ariko ari mu nzu nzima.
Ati:”Bamfashije iyi nzu ikavugururwa nanjye , byantera imbaraga nkabasha kugira imbaraga zo gukomeza gushakisha ariko abana banjye bari ahantu heza”.Umuturanyi wa Jean de Dieu waganiriye na Imvaho Nshya avuga ko ari uwo gufashwa kuko nk’abaturanyi baterwa impungenge n’ubuzima abayemo.
Yagize
ati:”Mu by’ukuri bafite imbaraga zo kwitunga ubwabo n’ubwo rimwe na rimwe tubagoboka
nk’abaturanyi, ariko kuvuga ngo basambure bubake iyi nzu, ntabwo babishobora.
Nk’abaturanyi twigeze kumukorera ubuvugizi ariko turategereza ntitwabona
yubakirwa”.
Yakomeje
agira ati:”Iyo dukoze inama hagakorwa urutonde rw’abatishoboye na we
bamushyiramo, ariko iyo bigarukira ntabwo tuhazi. Bamufashe kuko iyo imvura
iguye yose ishirira mu nzu kandi nibwo buzima babayemo”.
Umunyamabanga
Nshingwabikorwa w’Umurenge wa Rugerero UWAJENEZA Jeannette yabwiye Imvaho Nshya
ko Jean de Dieu Duturanyembazi n’umuryango we bari ku rutonde rw’abo bagiye
gusanurira inzu mubo bagiye gutangira kubakira.
Yagize
ati:”Duturanyembazi ikibazo cye turakizi kandi tugiye kumufasha kuko tumufite
ku rutonde rw’abantu tugiye kubakira ndetse tunamuvugururire igisenge”.
Jean de
Dieu Duturanyembazi ni umugabo w’imyaka 44 y’amavuko wabuze ababyeyi be ari
muto asigara mu nzu y’ibatsi yari yarubatswe n’ababyeyi be aba ari nayo
azaniramo umugore kugeza ubwo yubakiwe indi na Leta nayo yaje gusaza.
