Nduyahaga Josephine wo mu Mudugudu wa Rusongati , Akagari ka
Gisa, Umurenge wa Rugerero, arasaba ubufasha bwo kunganirwa kuzuza inzu ye
yagiyemo itarangiye kubera ubushobozi buke bikaba bimutera impungenge zo
guterwa mu gihe cy’ijoro.
Uwo mubyeyi avuga ko muri 2016 ari bwo yahuye n’ikibazo
cy’umutingito, ukamusenyeraho inzu, atangira gucumbikirwa n’abaturanyi, nyuma
bakaza kumufasha kubumba amatafari yo kongera kubaka iyo nzu ye yari yagiye
hasi yose ariko ngo kugeza ubu akaba yarayigiyemo idakinze neza bityo akaba
afite impungenge z’ubuzima bwe ari na yo mpamvu asaba ubufasha bwo kunganirwa
akabasha gukinga inzu ye no kuyihoma.
Nduhayaga Josephine yagize ati:”Muri icyo gihe nari mbayeho
mu buzima bubi cyane. Nari ntunzwe no guca inshuro nazo zitabashaga kuboneka
neza, uwbo rero uwo mutingito uje uyishyira hasi ubwo muri icyo gihe ngirwa
n’umuturanyi wahise amfasha antiza igikoni cye aba ari cyo mbamo”.
Akomeza avuga ko afashijwemo n’abaturage, muri 2020
batangiye kumubumbira amatafari yo kugira ngo iyo nzu yari yaguye ayubake.
Abaturage baramufashije, abagira neza baritanga kugeza isakawe ubundi ngo apfa
kuyijyamo idasakaye kuko uwari wamutije igikoni na we yari arikukimukuramo
kubera igihe yari akimazemo.
Yagize ati:”Muri icyo abaturanyi batangiye kumfasha kubumba
amatafari, baramfasha barayizamura , mbona umugiraneza ampa amabati nanjye
ngurisha agatungo nagiraga ndongeranya ubushobozi bushira idakinze nyijyamo
gutyo. Ubwo bukeye naje kubona umugira neza wavuze uti ntabwo wakomeza
gukingisha ihema fata urugi”.
Yakomeje agira ati:”Ubu ndasaba Leta ubufasha bwo gukinga
iyi nzu no kuba bayindangiriza kuko ntewe impungenge n’ibisambo n’abagira nabi
bashobora gusunika uru rugi cyangwa bagaca mu idirishya kuko ntabwo rifunze
kandi bamfashije kuyitera agasima baba bankoreye kuko sinkibona n’aho guca
inshuro”.
Umuturanyi we witwa Nyiransengiyumva Marie Goreth yabwiye
Imvaho Nshya ko Leta yamufasha gukinga inzu ye kuko bo nk’abaturanyi be hari
aho bagejeje imbaraga zikabashirana.
Ati:”Uyu mubyeyi yararaga adafunze kuko yashyiraga ku
muryango imifuka. Twaramufashije, dushiriwe tumukorera ubuvugizi dutegereza ko
bamufasha turaheba.Mu vuganire bamufashe gukinga kuko nk’uru rugi ntabwo
ruhakwiye ndetse nta n’amadirishya irimo ndetse ntabwo irangiye neza”.
Umunyamabanga Nshingwabikorwa w’Umurenge wa Rugerero
UWAJENEZA Jeannette yabwiye Imvaho Nshya ko ikibazo cy’uwo mubyeyi yakimenye
kandi ko bagiye kumufasha gushyiraho Umuganda umufasha guhoma neza inzu ye no
kumushakira inzu ndetse n’amadirishya.
Yagize ati:”Nibyo uwo mubyeyi afite ikibazo cy’uko inzu
abamo itarimo amadirishya ndetse n’inzugi kandi idahomye ariko tugiye kumufasha
gushyiraho umuganda w’abaturage tumufashe guhoma inzu ye ndetse no kuyishakira
amadirishya n’inzu”.
Uyu muturage avuga ko aramutse ahawe ubufasha byamufasha
kuba mu nzu ikinze dore ko ngo we ubushobozi bumaze kumushirana.
Ifoto igaragaza Umugi wa Rubavu
Umuturage arasaba ubufasha bwo kunganirwa mu gusanurirwa inzu
