Sanga:
Abakinnyi b’Abanyarwanda bakina mu mahanga bakomeje kwitwara neza cyangwa bagatanga umusanzu mu makipe yabo mu mpera z’icyumweru, mu gihe imyiteguro yo guhamagarwa mu Ikipe y’Igihugu “Amavubi” ikomeje, biteganyijwe ko izakina imikino ya FIFA Series izabera i Kigali muri Werurwe 2026. Mu Misiri, Al Masry SC ikinamo Mugisha Bonheur yatsinzwe na Kaizer Chiefs ibitego 2-1 mu mukino wa gatanu wo mu itsinda rya CAF Confederations Cup wabaye ku Cyumweru tariki ya 8 Gashyantare 2026. Uyu mukinnyi ukina hagati yugarira ntiyahawe amahirwe yo kugaragara muri uwo mukino. Muri Kenya, Nairobi United ikinamo Buregeya Prince na Hakizimana Muhadjiri yatsindiwe mu rugo na Wydad Casablanca yo muri Maroc. Byabaye umukino wa gatanu wikurikiranya iyi kipe idashoboye gutsinda mu mikino yo mu matsinda ya CAF Confederations Cup. Hakizimana Muhadjiri yinjiye mu kibuga asimbuye ku munota wa 76, mu gihe Buregeya Prince atakoreshejwe kubera imvune. Muri Azerbaijan, Zire FK ikinamo myugariro Mutsinzi Ange Jimmy yatsinze Sumqayit FK mu mukino w’umunsi wa 19 wa shampiyona, ikomeza gufata umwanya wa gatatu n’amanota 32. Mutsinzi yakinnye umukino wose. Mu Bubiligi, Samuel Gueulette ukinira RAAL La Louvière yinjiye mu kibuga asimbuye ku munota wa 63 mu mukino w’umunsi wa 24, batsinzwemo na Royale Union Saint-Gilloise ibitego 2-1. Muri Algeria, kapiteni w’Amavubi Djihad Bizimana ukinira CS Constantine yinjiye mu kibuga asimbuye ku munota wa 74, mu mukino batsinzemo MB Rouisat ibitego 2-1. Iyi ntsinzi yafashije CS Constantine kuguma ku mwanya wa kabiri n’amanota 29. Mu Libya, Manzi Thierry yakinnye iminota yose mu mukino Al Ahly Tripoli yanganyijemo na Swehly SC ubusa ku busa. Muri iyi shampiyona kandi, Nsabimana Aimable yakinnye umukino wose mu ntsinzi Assabah SC yakuye kuri Al Madina igitego 1-0, aho bakinana na Ishimwe Anicet ukina mu busatirizi anyuze ku mpande. Nanone muri Libya, Al Saqour ikinamo Rwatubabye Abdul yatsinzwe na Al Hilal Benghazi ibitego 3-1, uyu myugariro w’Umunyarwanda akina umukino wose. Muri Maroc, rutahizamu Gitego Arthur ukinira FUS Rabat ntiyakoreshejwe mu mukino warangiye anganyije na Olympique Dcheira igitego 1-1. Ku Cyumweru, Emmanuel Imanishimwe ukinira AEL Limassol muri Cyprus ntiyakinnye kuko ikipe ye yari iri mu myiteguro y’umukino wa shampiyona iteganyijwe ku wa Mbere tariki ya 9 Gashyantare 2026. Muri Sudani y’Epfo, Jamus SC ikinamo Muhire Kevin yatsinze Lion Hunters ibitego 5-0. Muhire yinjiye mu kibuga asimbuye ku munota wa 68. El Merrikh Bentiu ikinamo Ishimwe Saleh na Serumugo Ali yo ikomeje imyiteguro y’umukino wa shampiyona izakinamo na Salam Aweil FC uteganyijwe ku wa 11 Gashyantare 2026.
