Mu gihe Igikombe cy'Isi cya 2026 kigeze ku musozo, haracyari amatike ibihumbi ataragurwa ku mikino ya nyuma, harimo uwo guhatanira umwanya wa gatatu uzahuza u Bufaransa n'u Bwongereza, ndetse n'umukino wa nyuma uzahuza Argentina na Espagne.
Kugeza mu gitondo cyo ku wa Gatanu, ku rubuga rwa FIFA haracyari amatike agera ku 7,000 y'umukino uzahuza u Bufaransa n'u Bwongereza uzabera i Miami.
Muri ayo, amatike 1,246 yari akiri ku isoko risanzwe, aho igiciro cyayo cyatangiraga ku madolari 865 (asaga miliyoni 1.2 Frw), mu gihe andi yaguraga amadolari 1,125 (asaga miliyoni 1.6 Frw).
Hari kandi amatike 5,864 yashyizwe ku isoko ryo kongera kugurishwa, aho ahendutse yaguraga amadolari 455 (asaga ibihumbi 650 Frw), hiyongereyeho amafaranga angana na 15% yishyurwa FIFA.
Byagaragaye ko bamwe mu bari baraguze amatike bahisemo kongera kuyagurisha ku giciro kiri hasi ugereranyije n'icyo bayaguriyeho. Urugero ni itike yo mu cyiciro cya mbere yari yaraguzwe amadolari 1,125, ubu ikaba iri kugurishwa amadolari 659 gusa.
Si umukino wo guhatanira umwanya wa gatatu gusa ugifite amatike ataragurwa, kuko n'umukino wa nyuma uzahuza Argentina na Espagne na wo ugifite amatike make akiboneka.
Ku rubuga rwa FIFA haracyari amatike 32 yo mu cyiciro gihenze cyane, aho igiciro cyayo kiri hagati ya 29,995 na 32,970 by'amadolari ya Amerika, ni ukuvuga asaga miliyoni 43 kugeza kuri miliyoni 47 z'amafaranga y'u Rwanda ku itike imwe gusa. Aya si amatike ya VIP, ahubwo ni amatike asanzwe yo kwinjira muri sitade.
Ku rubuga rwa FIFA rwifashishwa mu kongera kugurisha amatike, haracyari andi arenga 1,000, menshi muri yo ari kugurishwa hafi y'igiciro cyayo cya mbere. Urugero, itike yaguraga amadolari 7,380 yashyirwagaho andi madolari 1,107 nk'amafaranga ya serivisi n'umusoro wa FIFA.
Igitangaje kurushaho ni uko hari itike imwe y'umukino wa nyuma yashyizwe ku isoko ku gaciro ka miliyoni ebyiri z'amadolari ya Amerika (asaga miliyari 2.8 Frw), hakiyongeraho amafaranga ya FIFA angana n'ibihumbi 300 by'amadolari.
FIFA yasobanuye ko ibiciro byo ku isoko ryo kongera kugurishirizaho amatike bigenwa n'abayafite, bityo ntibisobanure ko ari yo mafaranga abafana bari kuyishyura koko.
Umukino wo guhatanira umwanya wa gatatu uzahuza u Bufaransa n'u Bwongereza, mbere y'uko Argentina na Espagne zihatanira igikombe cy'Isi cya 2026 mu mukino wa nyuma.
