Sanga:
Umuhanzi w’icyamamare muri Afrobeats, David Adeleke uzwi nka Davido, aherutse gutangaza ko yikuye mu rubanza rwari rumaze igihe ruburanishwa rujyanye n’uburere bw’umukobwa we, Imade. Ibi yabitangaje nyuma y’uko agaragaje ko atanyuzwe n’imigendekere y’iburanisha n’ibyari byaratangiye kuvugirwamo mu rukiko. Mu butumwa yasangije abamukurikira ku rubuga rwa X ku wa 13 Gashyantare 2026, Davido yahakanye amakuru yavugaga ko yari yasabye uburere bwuzuye bw’umukobwa we. Yasobanuye ko icyo yashakaga ari uburere busesuye, aho impande zombi zagira uburenganzira bungana ku mwana wabo. Yashimangiye ko nta ruhande rwari rukwiye gufatwa nk’urwatsinze cyangwa urwatsinzwe, kuko ngo igihombo nyamukuru kiba ku mwana iyo ababyeyi be badahuza. Icyatumye afata icyemezo cyo kureka gukomeza urwo rubanza ni ibyavugiwe mu iburanisha byamukomerekeje cyane. Yavuze ko habayemo kugaruka ku mwana we w’umuhungu witabye Imana, asobanura ko byari ibintu atigeze atekereza ko byakwifashishwa muri uru rubanza. Yagaragaje ko kumwibutsa ayo mateka mu buryo butari ngombwa byamushenguye umutima, bigatuma ahitamo kwikura mu rubanza aho gukomeza inzira atishimiye. Uyu muhanzi kandi yagaragaje ko ibyo yakoze byose yabitewe n’urukundo n’inshingano ze nk’umubyeyi. Yemeje ko, nubwo hari abamucira urubanza mu itangazamakuru no ku mbuga nkoranyambaga, yizeye ko umukobwa we azakura azi ko se yamuharaniye kandi yamwitayeho uko bikwiye. Yasoje ubutumwa bwe agaragaza ko yifuza gukomeza ubuzima no gushyira imbere ituze ry’umuryango we. Mu bihe bishize, Davido yagiye agaragara ari kumwe n’umukobwa we mu bihe bitandukanye, ibintu byashimishije abakunzi be benshi. Nubwo ibibazo by’uburere byageze mu nkiko, hari icyizere ko bishobora gukemurwa mu mahoro, hagashyirwa imbere inyungu n’imibereho myiza by’umwana. Iyi nkuru yongeye kugaragaza uko ubuzima bw’ibyamamare bushobora guhura n’ibigeragezo byihariye, cyane cyane iyo bifitanye isano n’umuryango n’abana.
