Gen Muhoozi Kainarugaba , Umugaba Mukuru w'Ingabo za Uganda, akaba Umuhungu wa Perezida wa Uganda Yoweri Kaguta Museveni, yatangaje ko kubera amashusho y'aba-general bashyizwe mu kiruhuko cy'izabukuru yabagaragaye bari kubyina cyane , agomba kubafunga bose.
Abo ba-General bagaragaye bishimye ku munsi bashyirwagaho mu kiruhuko na Perezida wa Uganda Yoweri Kaguta Museveni, maze mu rwego rwo kwishima bakabyina cyane arinako bafatwa amashusho yageze kuri Muhoozi agafata icyo cyemezo cyo kubafunga aho yabivuze asa n'aho arimo kubatera ubwoba.
Anyuze kuri konti ye ya X aho asanzwe aterera urwenya, Gen Muhoozi Kainarugaba yagize ati:"Turimo gukora iperereza ku ba-General bagaragaye mu mashusho bari kubyina cyane. Vuba aha baraza gufungwa".
Mubundi butumwa , General Kainarugaba, yibajije impamvu abo basirikare bakuru bari barimo kwishimira gusezererwa mu ngabo za Uganda. Ati:"Bari bari kubyina kubera ko bavuye mu ngabo za Uganda (UPDF) ?. Ndatekereza ko kuva ubu kugeza ikindi gihe cyose , aba-general babujijwe kubyina cyane".
Ibyo bije nyuma y'aho Gen Muhoozi Kainarugaba yari aherutse gusimbuza Gen Edward Katumba Wamala uri mubashyizwe mu kiruhuko cy'izabukuru muri ibyo birori. General Muhoozi kandi yabonye Gen Katumba mubari bari kubyina muri ayo mashusho.
Ati:"Nabonye General Katumba arimo kubyina cyane , ahari yari azi neza ko ngiye kumuha akazi".
General Katumba ari muba General 19 bahawe ikiruhuko cy'izabukuru ndetse akaba yaranakoze mu nzego za Leta.
Abandi barimo; Lt Gen Charles Otema Anway, Lt Gen Charles Angina, Maj Gen Abel Kandiho, Maj Gen Geoffrey Tumusiime Katsigazi, Maj Gen Apollo Kasiita Gowa na Maj Gen Leopold Kyanda.
