Umuramyi Gentil Misigaro yongeye gushimisha abakunzi b’umuziki wa Gospel ashyira hanze indirimbo nshya yise “Uw’umwami akunda”, ahishura ko yanditswe na Israel Mbonyi ndetse anamushimira by’umwihariko ku ruhare yagize mu kuyitunganya. Iyi ndirimbo imaze amasaha make ishyizwe ku rubuga rwe rwa YouTube, aho yahise ayiherekeza ubutumwa bwo gushimira abayigizemo uruhare bose. Mu magambo ye yagize ati: “Ndashimira by’umwihariko n’umwanditsi w’iyi ndirimbo Israel Mbonyi.
” Mu bandi yagaragaje ko bamufashije harimo Yan Nick watunganyije amajwi yayo (audio production), BJC wakoze amashusho (video production), ndetse n’itsinda rya Gisubizo Ministries bafatanyije mu bikorwa bijyanye n’iyi ndirimbo. “Uw’umwami akunda” ni indirimbo irimo ubutumwa bukomeye bwo guhumuriza no gutanga icyizere, yibutsa abakunzi b’umuziki wo kuramya no guhimbaza Imana ko urukundo rw’Imana ku bayiringira rudacogora kandi rubaho iteka. Ubutumwa bwayo bushimangira ko n’iyo umuntu yanyuze mu bigeragezo bikomeye, aguma mu rukundo rw’Umwami.
Adrien Gentil Misigaro na Israel Mbonyi basanzwe bafitanye umubano wa hafi mu muziki wa Gospel. Mu 2025 baherukaga guhurira mu ndirimbo “Nkurikira”, yakunzwe cyane n’abakunzi b’uyu muziki. Gentil Misigaro azwi mu ndirimbo zakunzwe zirimo Biratungana, Buri Munsi, Ndaje, Hano ku Isi na Nyibutsa, zatumye aba umwe mu bahanzi bakomeye mu muziki wa Gospel nyarwanda.
Indirimbo “Uw’umwami akunda” ije yiyongera ku murage w’ibihangano bye byuzuyemo ubutumwa bwo kwizera no guhozanya, bikomeza kumwubakira izina rikomeye mu ruhando rw’abaramyi bo mu Rwanda no hanze yarwo. 
