Amakuru aremeza ko imipaka ihuza u Rwanda Repubulika
Iharanira Demokarasi ya Congo yamazegufungwa ku bw’impamvu zicyorezo cya Ebola
nyuma y’aho tubatangarije ko icyo cyorezo cyamaze kwica abagera kuri 80 byumwihariko
mu Burasirazuba bwa Congo.
Ibyo kuba imipaka yafunzwe byemejwe n’Umuyobozi w’Akarere
ka Rubavu bwana Mulindwa Prosper ubwo yaganiraga na Ukwezi tv ku murongo wa Telefone
kuri uyu wa 17 Gicurasi 2026.
Mulindwa Prosper yagize ati:”Yego , hano mu Karere ka
Rubavu umupaka wose wafunzwe haba la Cloniche ,
haba ‘Puwaruru’, haba Kabuhanga , ni umupaka wose. Ni icyemezo cyafashwe n’u
Rwanda kigendanye no gukumira icyorezo cya Ebola kiri muri Congo , ngirango mwagiye
musoma ibinyamakuru ko muri Congo icyorezo cya Ebola kihamaze iminsi kandi hari
amakuru y’uko kiri no mu bice byegereye u Rwanda”.
Mulindwa Prosper yakomeje avuga ko abari bambutse batarabuzwa
gutaha. Ati:”Hari imikoranire y’inzego , Umunyarwanda ntabwo wamubuza gutaha
iwabo , igihe cyose akeneye gutaha arataha ariko haba hari ingamba zateganyijwe
ku mupaka z’ubuzima , gusuzumwa noneho abaganga bakamukurikirana ariko agataha biremewe
…. Ni nk’uko n’Abanyecongo batari iwabo
bemerewe gutaha kandi biba ari ugufunga umupaka igihe gito kugira ngo turebe
niba koko twiteguye gukurikirana urujya n’uruza rw’abantu mu buryo budashobora
guteza ibibazo icyo cyorezo kikatwinjirira”.
Kubyerekeye kuba hari abarashyirwa mu kati , Mayor wa
Rubavu yavuze ko ibyo bifite urwego rubishinzwe (RBC), bityo ko ari bo bazi uko
bakurikirana abakekwaho kwandura.
Umuyobozi w’Akarere ka Rubavu kandi yasabye abaturage
kuba bahagaritse kujya muri Congo bakubahiriza icyemezo cyafashwe bagakomeza
gukora ibikorwa byabo bisanzwe ndetse bakirinda kugira ubwoba kuko nta cyorezo
kiri mu Rwanda ariko ko ari ugukumira.
Kugeza ubu , Icyorezo cya Ebola kimaze kwica abantu bagera kuri 80 muri Repubulika Iharanira Demokarasi ya Congo nk'uko byakomeje gutangazwa n'ibinyamakuru bitandukanye.
Amakuru avuga ko hamaze kuboneka abantu bagera kuri 246 banduye Icyorezo cya Ebola, mu Migi imwe n'imwe ikorerwamo ubucukuzi bw'amabuye y'agaciro nka Mongwalu ndetse na Rwampara nk'uko byatangajwe na "Africa Centres for Disease Control and Prevention".
Ubuyobozi bwa Uganda nabwo bwatangaje ko habonetse umuntu umwe wanduye icyo cyorezo agikuye mu Burasirazuba bwa Repubulika Iharanira Demokarasi ya Congo ndetse ngo akaba yarapfuye ku wa Kane azize iyo ndwara. Uwapfuye akaba ari umusaza w'imyaka 59.
Ebola yagaragaye bwa Mbere mu 1976 muri Repubulika Iharanira Demokarasi ya Congo y'ubu , bikavugwa ko yaturutse ku gacurama. Ni ku nshuro ya 17 icyo cyorezo cyishe abantu muri icyo Gihugu ndetse akaba ari Icyorezo cyandurira mu gukoranaho.
Ebola ni icyorezo kitari cyabona umuti cyangwa urukingo
nk'uko byatangajwe n'Umuryango wa World Health Organization (WHO), mu gihe
amahirwe yo gukira icyo cyorezo kiri kuri 50%.
Mu bipimo byakozwe ku ikubitiro muri Repubulika Iharanira Demokarasi ya Congo byafatiwe ku Kigo cya 'Institut National de Recherche Biomédicale', aho mu bantu 20 bapimwe 13 basanzwemo icyo cyorezo nk'uko byatangajwe na Minisiteri y'Ubuzima.
Nyuma y'aho icyo cyorezo kigaragariye , abantu banduye kimwe n'abandi baturage basabwe gukurikiza amabwiriza abafasha kutacyandura basaba n'uwibonaho ibimenyetso kugana kwa muganga. Kugeza ubu ntabwo Leta ya Congo yari yatangaza iby'icyo cyorezo.Mu myaka 50 ishize abantu bagera ku 15,000 baturuka mu Bihugu byinshi by'Isi bamaze kwicwa nacyo. Muri Congo , abagera ku 2,300 bamaze gupfa mu myaka ya 2018 na 2020.
