Perezida wa Repubulika y’u Rwanda, Paul Kagame, yatangaje ko nta muntu uzongera kwica u Rwanda cyangwa Abanyarwanda ku nshuro ya kabiri, ashimangira ko amateka mabi yabaye atazongera kwisubira.
Ibi yabigarutseho kuri uyu wa Kabiri tariki ya 7 Mata 2026, mu muhango wo gutangiza Icyumweru cy’Icyunamo n’iminsi 100 yo kwibuka ku nshuro ya 32 Jenoside yakorewe Abatutsi mu 1994, wabereye ku Kigali Genocide Memorial ku Gisozi.
Perezida Kagame yavuze ko ubuhamya bwatanzwe bufite ishingiro rikomeye, bityo ko abagerageza guhakana Jenoside yakorewe Abatutsi bafite akazi gakomeye ko kunyuranya n’ukuri.
Yagize ati: “Nagira ngo mpere ku buhamya Minisitiri Bizimana yatugejejeho. Ibyo twumvise byose bifite aho bishingiye. Abafite uko babihakana bafite akazi gakomeye.”
Yakomeje avuga ko hari abagerageza guhindura amateka y’u Rwanda, cyane cyane abo hanze y’igihugu, ariko ko ibyo bidashobora guhindura ukuri kwabaye.
Ati: “Kugira ngo uhindure amateka nk’ayo y’abantu, yaba hano mu gihugu cyangwa hanze, cyane cyane aho bakunze kugoreka amateka yacu ku mpamvu zitandukanye, bafite ibyo bazahangana nabyo kugira ngo bayavuge ukundi.”
Perezida Kagame yagaragaje ko ibihe byahindutse, bityo ko nta muntu uzongera kwicwa nk’uko byagenze mu 1994.
Ati: “Ibihe byarahindutse, ntawe uzongera gupfa kuriya. Ntawakongera gupfa kuriya. Impamvu ni nyinshi, ariko ntabwo wakwica umuntu kabiri. Ugerageje kubikora, azakwica mbere y’uko umwica.”
Yanashimangiye ko u Rwanda rudashobora kongera gusubira mu mateka mabi, asobanura ko igihugu gifite imbaraga zo kwirinda no kurinda abaturage bacyo.
Ati: “Iki gihugu cy’u Rwanda ntigishobora gupfa kabiri. Mbere y’uko wica u Rwanda ruzakwica. Ntabwo wakwica abantu kabiri, ntibibaho. Uko mutureba aha, ntawe uzatwica kabiri—aba bakuru cyangwa abana bacu.”
Mu gusoza, Perezida Kagame yavuze ko Abanyarwanda bafite uburenganzira bwo kubaho kandi bazabaho batabanje gusaba undi wese.
Yagize ati: “Tuzabaho byanze bikunze, ntawe dusaba kubaho. Uku mbivuze, hari abazabisubiramo cyangwa bakabivuga ukundi, ariko ni ko bimeze.”
