Umukinnyi wo hagati Yannick Mukunzi yasinye mu ikipe ya Helges IF yo mu Cyiciro cya kabiri muri Suède, nyuma yo gutandukana na Sandvikens IF.
Umukinnyi wo hagati Yannick Mukunzi yasinye mu ikipe ya Helges IF yo mu Cyiciro cya kabiri muri Suède, nyuma yo gutandukana na Sandvikens IF.
Iyi kipe yatangaje aya makuru ku wa 5 Mata ibinyujije ku mbuga nkoranyambaga zayo, igaragaza ko yishimiye kwakira uyu mukinnyi ukomoka mu Rwanda, imwizeza ko azagira uruhare mu kugera ku ntego zayo mu mwaka wa 2026.
Ubuyobozi bwa Helges IF bwagaragaje ko Mukunzi ari umukinnyi ufite imbaraga, tekinike n’ubushobozi bwo gusoma umukino neza, bityo ko azafasha iyi kipe mu mikino yayo.
Ku ruhande rwe, Mukunzi yavuze ko yishimiye kujya muri iyi kipe kuko abona ari ahantu heza hazamufasha gutera imbere mu mupira w’amaguru, anashimangira ko yiteguye gutanga imbaraga ze zose.
Agezeyo, asanze undi Munyarwanda Bernabé Mubumbyi, bakaba barigeze gukinana muri APR FC.
Mukunzi w’imyaka 30 asanzwe amenyereye Shampiyona yo muri Suède, aho yamaze imyaka itandatu akinira Sandvikens IF, ayifasha kuva mu Cyiciro cya Gatatu. Icyakora, yari amaze imyaka ibiri adakina kubera imvune ikomeye y’ivi (ligament croisé) yamubayeho inshuro ebyiri.
