Rayon Sports Women FC yatangiye nabi irushanwa rya CAF Women's Champions League CECAFA QUALFIERS nyuma yo kunganya na Mafunzo Women FC yo muri Zanzibar
Ku wa gatanu tariki 21 Kanama 2026 nibwo mu Rwanda hatangiye irushanwa rya CAF Women's Champions League CECAFA QUALFIERS ku makipe abarizwa mu gice cya CECAFA ahagomba kuboneka ikipe izahagararira CECAFA mu mikino ya Champions League mu Bagore.
Rayon Sports WFC ihagarariye u Rwanda ikaba ari inshuro ya gatatu yitabiriye iri rushanwa ikaba itaragira amahirwe yo kuryegukana.
Yakinnye umukino wayo wa mbere ufungura iri rushanwa aho yari yitezwe kwitwara neza imbere y'abakunzi bayo, ariko yaje gutungurwa na Mafunzo WFC yo muri Zanzibar aho banganyije ubusa ku busa.
Ni umukino wari witabiriye n'Umuyobozi wa Ferwafa wungirije Richard, Umuyoboi ushyize komisiyo y'umupira w'abagore muri Ferwafa Gicanda,Umuyobozi wa Rwanda Premier League Hadji Mudaheranwa, Umuyobozi wa Rayon Sports FC Hadji Murenzi Abdallah, Umuvugizi wa Rayon Gakwaya, Rutagambwa, Gacinya.
Ni Umukino watangiye Mafunzo WFC ubona irimo kwiharira umupira cyane wabonaga irimo gushaka gutsinda igitego hakiri kare cyane.
Ku munota wa 3, Mafunzo WFC yo muri Tanzania yahushije uburyo bwa mbere bukomeye ku mupira mwiza wabonywe na Jackline Kulusanga wacenze ateye ishoti Rayon Sports iwushyira muri Koroneri itagize ikivamo.
Mu minota iri hagati 10 na 20, amakipe yombi yatangiye gucungana cyane ubona nta yirimo gushaka kugera imbere y'izamu cyane. Amakipe yombi muri iyi minota wabonaga arimo gukinira hagati mu kibuga bitandukanye ni uko umukino watangiye.
Ku munota wa 27, Mafunzo WFC yongeye guhusha uburyo bukomeye. Ni umupira mwiza wazamukanwe na Cynthia Musungu atanga umupira mwiza ashakisha Mounifatou Helbi umubana muremure, umuzamu wa Rayon Sports aratabara awushyira hanze.
Ku munota wa 31, Rayon Sports WFC yabonye amahirwe yo gutsinda igitego ariko biranga.
Ni umupira wavuye muri Koroneri yatewe neza na Umwali Uwase usanga aho Ihirwe Regine ahagaze agiye gutera ishoti akorerwa ikosa ariko kufura Rayon WFC yahawe ntiyayibyaza umusaruro.
Ku munota wa 37, ikipe ya Rayon Sports yahushije uburyo bukomeye kuri koroneri yatewe neza na Umwari Wase ariko abakobwa ba Mufunzo SC baratabara. Aya mahirwe Rayon Sports yayabonye nyuma yo kwiharira umupira cyane ndetse ubona abakobwa bayo bakina mu kibuga hagati barimo guhanahana neza.
Igice cya mbere cyarangiye amakipe yombi anganya
Igice cya mbere hagati ya Rayon Sports WFC na Mafunzo WFC, cyarangiye ikipe zombi zinganyaije 0-0.
Ni igice wabonaga amakipe asimburana iminota yo gukina neza kuko hari iminota wabonaga yihariwe na Mafunzo WFC ndetse indi udasanga iyobowe na Rayon Sports WFC.
Mu gice cya kabiri
Igice cya kabiri gitangiranye imbagaraga nyinshi ku ruhande rwa Rayon Sports WFC kuko abakobwa bayo bagarutse batakana imbaraga nyinshi ubona ko umutoza Rwaka Claude hari ibyo ababwiye ubwo bari bagiye mu rwambariro.
Ku munota wa 58, Rayon Sports WFC yakoze impinduka umutoza akura mu kibuga Umwali Uwase, Ntakobanjila Salama na Uwanyirigira Sifa yinjiza mu kibuga Ukwinkunda Jeannette, Niyonshuti Emerance na Ishimwe Mizero Evelyne.
Ku munota wa 65, i Mafunzo WFC yahushije uburyo bukomeye. Ni uburyo bwabonywe na Dulwende Ouoba ariko agiye gutera ishoti rikomeye umupira ukurwamo na ba myugariro ba Rayon Sports WFC.
Ku munota wa 68, Rayon Sports WFC yatatse cyane izamu rya Mafunzo WFC ariko kubyaza umusaruro amahirwe yari ibonye biranga. Ni umupira mwiza waamukanwe na Mukeshimana Dorothee atera Snatire nziza ica imbere y'izamu ariko habura umwataka ukoraho gusa ngo ujye mu izamu.
Ku munota wa 73, Mafunzo WFC yakoze impinduka umutoza akura mu kibuga Mounifatou Helbi yinjizamo Leunina Ngonapipi.
Ku munota wa 80, Rayon Sports WFC yahushije uburyo bukomeye. Ni umupira mwiza wazamukanywe na Ukwinkunda Jeannette aha neza Mukeshiman Dorothee atera Santire nziza umupira ugiye gufatwa n'umuzamu arawuruka asubijemo uca hejuru y'izamu.
Ku munota wa 87, ikipe ya Rayon Sports yari itsinzwe igitego ariko ku bw'amahirwe nticyajyamo. Ni umupira wazamukanwe na Cynthia Musunga ariko ateye ishoti umupira ukubita ipoto uvamo.
Umusifuzi wa Kane yongeyeho iminota ine yinyongera.
Ku munota wa 92, Rayon Sports Women FC nayo yabuze uburyo bukomeye. Ni umupira mwiza wazamakunwe na Ishimwe Mizero Evelyne ateye ishoti rikomeye umupira ukubita ipoto uvamo.
Umukino warangiye Rayon Sports Women FC inganyije na Mafunzo Women FC 0-0. Ni umukino wakomereye cyane ikipe ya Rayon Sports WFC bitandukanye ni uko yari ibyiteze.
Mbere y'uyu mukino hari habanje undi mukino wahuje Yei Joint Stars women FC yo muri Sudan y'epfo yatsinze Denden women FC yo muri Djibuti ibitego 3-0. Bituma Yei Joint women FC iyobora itsinda n'amanota atatu n'ibitego bitatu izigamye, ikaba ikurikiwe na Rayon Sports Women FC na Mafunzo Women FC zose zifite inota rimwe mu gihe Denden women FC ariyo ya nyuma ifite ubusa n'umwenda w'ibitego 3.
Imikino ikazakomeza ku munsi w'ejo.
