Perezida wa Leta Zunze Ubumwe za Amerika, Donald Trump, yandagaje Umushumba Mukuru wa Kiliziya Gatulika, Pope Leo XIV, amwita umuntu w’umunyantege nke ku bijyanye n’umutekano n’ububanyi n’amahanga, ndetse avuga ko adakwiriye kuyobora Kiliziya ku rwego mpuzamahanga.
Ibi Trump yabivugiye ku rubuga rwe rwa Truth Social ku Cyumweru tariki ya 12 Mata 2026, aho yanenze Papa Leo XIV ku bitekerezo bye byo kwamagana intambara za Amerika n’ihuriro ryayo muri Iran, ndetse n’ibindi bikorwa bya gisirikare Washington ikomeje gukorera mu bindi bice by’isi.
Trump yavuze ko atishimiye uburyo Papa Leo XIV anenga politiki ya Amerika, cyane cyane ku bijyanye n’intambara n’umutekano, avuga ko adashyigikiye umuntu “utekereza ko ari byiza kureka Iran ikagira intwaro kirimbuzi” cyangwa unenga ibitero bya Amerika.
Yanasubiye ku gihe cya COVID-19, avuga ko Kiliziya n’andi matorero byafunzwe mu buryo budakwiye, anashinja Papa Leo XIV kutabyamagana mu gihe abandi bari mu kaga.
Mu magambo ye, Trump yanavuze ko Papa Leo XIV “yashyizweho ku mpamvu za politiki” ndetse avuga ko kuba ari Umunyamerika byashoboraga kuba byaragize uruhare mu gutorwa kwe".
Ubu butumwa bwa Trump bwakiriwe mu buryo butandukanye ku rwego mpuzamahanga, aho bamwe bavuga ko ari imvugo idakwiye hagati y’umuyobozi w’igihugu n’umuyobozi w’idini rikomeye ku Isi, mu gihe abandi babifata nk’ubushyamirane bukomeje hagati y’impande zombi.
Ku rundi ruhande, Papa Leo XIV we yakomeje kugaragaza ko aharanira amahoro, anenga intambara ziri gukorerwa mu bice bitandukanye by’isi, ndetse asaba ibiganiro aho gukoresha imbaraga za gisirikare.
Isoko: Al Jazeera
