U Rwanda na Koreya y’Epfo bikomeje kwagura ubufatanye mu burezi, ikoranabuhanga, ubuzima n’iterambere ry’ubukungu, mu gihe hateganyijwe inama izahuza impuguke z’ibihugu byombi kugira ngo zungurane ibitekerezo ku ikoreshwa ry’ubwenge buhangano (AI) mu burezi.
Iyi nama yiswe 2026 Korea-Rwanda Seminar on Cooperation in AI Education, ifite insanganyamatsiko igira iti “Preparing Future Talent in the AI Era”, iteganyijwe ku wa Mbere, tariki ya 23 Ugushyingo 2026, guhera saa yine za mu gitondo, muri Kigali Serena Hotel, mu Mujyi wa Kigali. Izategurwa ku bufatanye bwa Ambasade ya Koreya y’Epfo mu Rwanda, Ikigo cy’Igihugu gishinzwe Uburezi mu Rwanda (REB) n’Ikigo cya Koreya gishinzwe amakuru n’ubushakashatsi mu burezi (KERIS).
Iyi nama izibanda ku buryo ubwenge buhangano bwakoreshwa mu kunoza imyigishirize, gufasha abarimu n’abanyeshuri gukoresha ikoranabuhanga no gutegura urubyiruko ruzagira ubumenyi bukenewe ku isoko ry’umurimo ryo mu gihe kizaza.
Ubufatanye bw’u Rwanda na Koreya y’Epfo mu burezi n’ikoranabuhanga busanzwe bugaragarira mu mishinga itandukanye. Ku wa 1 Ukwakira 2026, Ambasaderi wa Koreya y’Epfo mu Rwanda, Huh Jungae, yasuye ishuri rya Rwanda Coding Academy riherereye mu Karere ka Nyabihu, agamije kureba aho imirimo yo kubaka no guteza imbere iri shuri igeze.
Uyu mushinga, ufite agaciro ka miliyoni 8,09 z’amadolari ya Amerika, watangiye mu 2021 ukazasoza mu 2026. Ukorwa n’Ikigo cya Koreya gishinzwe ubutwererane mpuzamahanga (KOICA) ku bufatanye n’Urwego rw’Igihugu rushinzwe Amashuri y’Imyuga n’Ubumenyingiro (RTB), ugamije kongerera iri shuri ubushobozi bwo guhugura abanyeshuri mu bijyanye no gukora porogaramu za mudasobwa n’ikoranabuhanga.
Ku wa 21 Ukwakira 2026, abayobozi b’u Rwanda na Koreya y’Epfo baganiriye ku buryo ibihugu byombi byakomeza ubufatanye mu bwenge buhangano, ibikorwa remezo by’ikoranabuhanga n’imijyi ikoresha ikoranabuhanga mu kunoza serivisi. Ibiganiro byahuje Umunyamabanga wa Leta muri Minisiteri y’Ikoranabuhanga na Inovasiyo, Yves Iradukunda, na Je Myung Ryu, Visi-Minisitiri wa Koreya y’Epfo ushinzwe siyansi n’ikoranabuhanga.
Mu kwezi kwa Gicurasi 2026, u Rwanda na Koreya y’Epfo kandi byasoje umushinga wa miliyoni 4,5 z’amadolari wagamije kongerera abaturage ubumenyi bw’ibanze mu gukoresha ikoranabuhanga. Uwo mushinga wakozwe na KOICA ku bufatanye na Leta y’u Rwanda binyuze muri gahunda y’Abaderevu b’Ikoranabuhanga (Digital Ambassadors Program), ifasha abaturage kumenya gukoresha serivisi za Leta zitangwa hifashishijwe ikoranabuhanga, zirimo iziboneka kuri Irembo.
Ubufatanye bw’ibihugu byombi bunagaragarira mu masezerano y’inkunga y’iterambere yasinywe ku wa 5 Nyakanga 2024, afite agaciro ka miliyari imwe y’amadolari ya Amerika, azakoreshwa mu mishinga itandukanye hagati ya 2024 na 2028. Azibanda ku nzego zirimo ubwikorezi, ubuzima n’uburezi, mu rwego rwo gushyigikira gahunda y’Igihugu yo Kwihutisha Iterambere, NST2.
Mu nama iteganyijwe ku wa 23 Ugushyingo, hazatanga ibiganiro Bwana KWAK Byung Il, ukuriye ishami rishinzwe ubufatanye muri KERIS, Madamu SENGATI Uwasenga Diane, umuyobozi w’agateganyo w’ishami rishinzwe ikoranabuhanga mu burezi muri REB, na Bwana PARK Ki Woong, umushakashatsi mukuru muri KERIS. Hazabaho kandi umwanya wo kubaza ibibazo no gutanga ibitekerezo, ndetse n’umuhango wo gutanga ibihembo mu marushanwa y’ibikubiyemo by’ikoranabuhanga rya AI yo mu 2026.
Abifuza kwitabira iyi nama basabwe kwiyandikisha mbere y’itariki ya 15 Ugushyingo 2026, bakoresheje kode ya QR iri ku itangazo ryayo. Abategura iyi nama batangaje ko abazitabira bazahabwa ikiruhuko cya kawa, amafunguro ya saa sita n’impano y’urwibutso.
Zimwe mu ngaruka zitezwe mu burezi nyuma y'iyi nama Harimo izi zikurikira:
1.Kunoza imyigishirize n’imyigire hifashishijwe ubwenge buhangano.
2.Guteza imbere imitekerereze n’imyitwarire by’abanyeshuri (Educational Psychology).
3.Gushyigikira imyigire ijyanye n’ubushobozi bwa buri munyeshuri (Personalized Learning).
4.Guteza imbere uburezi budaheza (Inclusive Education).
5.Kongerera abarimu n’abanyeshuri ubumenyi bw’ikoranabuhanga.
6.Kunoza isuzuma ry’ubumenyi n’imikorere y’abanyeshuri.
7.Guteza imbere amahugurwa n’ihererekanyamakuru hagati y’u Rwanda na Koreya y’Epfo.
8.Guhanga udushya mu ikoranabuhanga rikoreshwa mu burezi.
Iyi nama ije ikurikira indi mishinga n’ibiganiro byerekana ko u Rwanda na Koreya y’Epfo bikomeje kwagura imikoranire mu guteza imbere ubumenyi, ikoranabuhanga n’ubukungu. Ibyo bigaragaza ko ubufatanye bw’ibihugu byombi bukomeje kwibanda ku kongerera urubyiruko ubushobozi no gutegura inzego z’igihugu guhangana n’impinduka ziterwa n’iterambere ry’ikoranabuhanga.
Ibyifuzo by’abasomyi
