Rutahizamu wa Real Madrid, Vinicius Jr yambitse impeta umukunzi we w’umunyamideli akaba azwi no ku mbuga nkoranyambaga, Virginia Fonseca, nyuma y’umwaka umwe bakundana.
Aba bombi bifashishije imbuga nkoranyambaga mu gutangaza intambwe nshya bateye mu rukundo rwabo, aho berekanye impeta zisa bari bambaye ku ntoki, bityo ko umubano wabo ugeze ku kindi cyiciro.
Virginia Fonseca, uzwi cyane ku mbuga nkoranyambaga aho akurikirwa n’abantu barenga miliyoni 35, ni we washyize hanze ifoto igaragaza bombi bambaye izo mpeta.
Mu butumwa buherekeje iyo foto, yagaragaje ko nyuma y’umwaka bakundana, ubu bombi bafite impeta z'urukundo, bishimangira ko bahisemo gukomeza ubuzima bwabo bari kumwe.
Fonseca amaze igihe ari hafi cyane ya Vinicius Jr. i Madrid, ndetse ku wa Gatandatu w’icyumweru gishize yari yitabiriye umukino Real Madrid yatsinzemo Rayo Vallecano ibitego 4-1 kuri Santiago Bernabéu.
Umubano w’aba bombi umaze igihe uvugisha benshi, cyane cyane nyuma y’uko Virginia atangiye kugira uruhare runini mu buzima bwa Vinicius no kuba yarinjije mu buzima bwe abana be batatu, Maria Alice, Maria Flor na José Leonardo.
