Ni ibintu bishoboka koko kandi bishingiye ku buhanga bwo mu buhinzi bwitwa Grafting (kubangurira). Ubu buryo bumaze imyaka myinshi bukoreshwa mu guteza imbere umusaruro w’ibihingwa bitandukanye.
Mu bikorwa byabwo, umuhinzi abanza gutera imbuto z’inyanya n’iz’ibirayi buri kimwe ukwacyo. Iyo zimaze gukura, afata ingemwe y’urunyanya (scion) akayihuza n’uruti rw’ikirayi (rootstock). Ibi bituma igihingwa kimwe gitanga umusaruro w’ibihingwa bibiri: hejuru hakera inyanya, mu butaka hakaboneka ibirayi.
Impamvu ibi bishoboka ni uko inyanya n’ibirayi byose bibarizwa mu muryango umwe w’ibimera witwa Solanaceae, uhuza n’ibindi bihingwa nk’urusenda n’ibibiringanya. Kuba bifitanye isano ya hafi mu miterere bituma bishobora guhuza neza bigakomeza gukura nk’igihingwa kimwe.
Iki gihingwa kidasanzwe gikunze kwitwa “Pomato” cyangwa “Pomtato”, nubwo kitaramenyekana cyane mu bihugu byinshi.
Ibyiza by’ubu buryo ni byinshi. Bushobora gufasha abahinzi kubona umusaruro mwinshi ku buso buto, cyane cyane mu bihugu bifite ikibazo cy’ubutaka buhagije bwo guhingamo. Bukanongera ubushobozi bw’ibihingwa bwo guhangana n’indwara, ndetse bugatuma umusaruro wiyongera.
Ku gihugu nk’u Rwanda, ubu buhanga bushobora kuba igisubizo ku kibazo cy’ubutaka bugabanuka n’ubwiyongere bw’abaturage, ndetse bugafasha mu kuzamura ubukungu bw’abahinzi kuko inyanya n’ibirayi biri mu bihingwa bikenerwa cyane ku isoko.
Ibi byose bigaragaza ko ubushakashatsi mu buhinzi bukomeje kugira uruhare rukomeye mu gukemura ibibazo by’inzara no kongera umusaruro ku Isi.
