Hari ibyo umuntu utangiye kurera abona ku mwana we akagira ubwoba nyamara ntacyo bitwaye. Ubwo bwoba bukaba bunatuma rimwe na rimwe ashobora guhungabana, Twifashishije inkuru yanditswe na Uw Michou anyuze ku rubuga rwa TikTok, turagaruka kuri ibyo bintu na we wasura konte ye ukamuforowinga ukabasha kujya ukurikirana inkuru zitandukanye ashyiraho.
Kuba Umwana yakwitsamura cyane: Abana b’impinja bagira amazuru mato kandi yoroshye cyane, bityo bakunze kwitsamura kugira ngo basohoremo ivumbi, amata/amashereka. Si buri gihe biba bivuze ko umwana arwaye ibicurane.
2.
Kuba Umwana yagira itsepfu: Itsepfu ni ibintu bisanzwe cyane ku bana b’impinja kuko diaphragm yabo iba ikiri gukura. Bishobora kuba nyuma yo konsa cyangwa igihe umwana yamize umwuka.
3.
Gushaka konka buri kanya: Hari igihe umwana ashaka konka inshuro nyinshi cyane, cyane cyane nimugoroba. Ibi ni ibisanzwe kandi bikunze kuba igihe umwana ari gukura cyane. Si ukuvuga ko amashereka yawe adahagije.
4. Ahantu horoshye ku mutwe w’umwana (fontanelle): Aho hantu horoshye(hameze nkahatebeyemo imbere) ku mutwe w’umwana ni ibisanzwe kandi bifasha igihe cyo kuvuka no gukura kw’ubwonko. Wowe fata umwana neza gusa, ntugire ubwoba igihe ubibonye.
5. Uruhu rw’umwana rumeze nkurwikiraho, rushishuka: Abana benshi b’impinja bakoboka uruhu mu minsi cyangwa ibyumweru bya mbere nyuma yo kuvuka. Uruhu rwabo ruba rwimenyereza ubuzima bwo hanze.
6. Gusinzira mu buryo budasanzwe, agenda ahinduranya ibihe byo gusinzira: Ugasanga kumanywa aba Asinziye, nijoro akarara areba, Abana b’impinja bakanguka kenshi kugira ngo bonswe kandi bagasinzira amasaha make make. Ntibaba bazi itandukaniro ry’amanywa n’ijoro.
7. Guhinduka kw’umwanda umwana yituma: Umwanda w'umwana ushobora guhindura ibara, uko usa n’inshuro uza bitewe n’iminsi afite cyangwa uko agaburirwa. Umuhondo, icyatsi cyangwa kwituma kenshi byose bishobora kuba ibintu bisanzwe.
8. Gushikagurika: Hari igihe umwana aba aryamye ukabona ahise akanguka cyangwa arambuye amaboko cyangwa agakanguka atunguwe yari yasinziye. Ibi byitwa Moro reflex kandi ni ibisanzwe cyane.
Si ibintu byose biteye ubwoba biba ari ikibazo gikomeye, ariko igihe cyose hari ikiguhangayikishije cyane, hamagara cyangwa ubaze muganga wawe kugira utekane.
