DRC: Abarimu barigusaba ko amashuri afungwa kubera Ebola

Abo barimu bigisha mu bigo bya Leta by’umwihariko, bavuga ko bananiwe guhangana n’ingamba zo gutandukanya abana. Abasaba ihagarikwa ry’amashuri cyane cyane ni abo muri Ituri mu gace ka Mambasa , aho babitangarije mu Ihuriro Rikuru rihuza abarimu bigisha mu mashuri abanza mu cyiciro cya 3 muri Mambasa.

Abo barimu bagaragaje ko ubwo busabe bwabo buterwa n’ubwiyongere bw’abantu bamaze kwandura icyorezo cya Ebola mu gace ka Niania gaherereye muri Metero 350 mu Majyepfo y’Intara ya Bunia ahari ‘Santere’ ivurirwamo abagaragaweho n’ibimenyetso bya Ebola.

Bavuga ko amashuri akwiriye gufungwa cyangwa se bagahabwa ubufasha bwose bushoboka kugira ngo hashyirweho uburyo bwo kwiga abanyeshuri batandukanye by’umwihariko bafashijwe na Minisiteri y’Uburezi muri icyo Gihugu.

Ku rundi ruhande kandi umuyobozi ushinzwe uburezi mu Ntara ya Ituri I, we yasabye abarimo gukomeza amashuri abana bakiga nk’uko bisanzwe, abibutsa gukomeza kwibuka ko Ebola ihari birinda uko bashoboye hagendewe ku ngamba z’ubwirinzi.

Yavuze ko gutandukanya abana aricyo gisubizo mu gihe , byaba byagaragaye ko Ebola ibegereye.

Muri Teritwari ya Djugu , ibigo bimwe biherereye mu gace ka Nizi, ntabwo byari byafungura imiryango aho ababyeyi bamwe banze kohereza abana babo ku ishuri kubera gutinya icyorezo cya Ebola.

Umuyobozi ushinzwe uburezi muri iyo Ntara, yijeje abaturage ko binyuze mu bafatanyabikorwa babo , bazakomeza gutanga ubufasha hagambiriwe kwirinda no gukumira icyo cyorezo mu Ntara ya Ituri.

Kugeza ubu Ebola imaze guhitana ubuzima bw’abatari bake mu Gihugu hose, mu gihe n’abagaragayeho icyo cyorezo ari benshi mu bice bitandukanye by’Igihugu.