Rwamagana: Ububiko bw’ibikoresho by’amashanyarazi bwafashwe n’inkongi

Iyo nkuru y’iyi nkongi yatangajwe muri iki gice kugicamunsi cyo ku wa Mbere tariki ya 7 Nzeri 2026  mu Mudugudu wa Kavura mu Kagari ka Nyagasenyi mu Murenge wa Kigabiro mu Karere ka Rwamagana.

Bamwe mu baturage baganiriye n’ikinyamakuru igihe dukesha iyi nkuru bavuga ko babonye umwotsi mwinshi mu kirere bituma bajya kureba icyabaye bagezeyo basanga hari gushya mu buryo bukomeye. Bavuze ko nyuma Polisi y’u Rwanda yahise ihagera ariko isanga n’ubundi byinshi mu bikoresho by’amashanyarazi byamaze kwangirika cyane.

SSP Hamduni Twizeyimana umuvugizi wa Polisi y’u Rwanda mu Ntara y’Iburasirazuba, yavuze ko kugeza ubu batari bamenya icyateye iyi nkongi y’umuriro, ahamya ko Polisi yahageze ndetse yanatangiye kuzimya.

Mu magambo ye yagize ati:”Ubu ikiri gukorwa ni ukuzimya ibishirira kugira ngo bitaza kongera kuvumbuka nyuma bikongera bigateza ibibazo. Gusa aka kanya ntabwo turamenya icyabiteye ariko turi kubikurikirana.’’

Umuvugizi wa Polisi muri iyo Ntara , SSP Twizeyimana yakomeje asaba abantu kwirinda kubika ibintu mu buryo buvanze cyane cyane mu gihe harimo ibishobora gutera inkongi vuba, yasabye abaturage kandi kwirinda gutwika ibintu aho babonye hose kuko bishobora gukwirakwiza inkongi ndetse no gutunga ibikoresho by’ibanze bishobora kuzimya inkongi.

Kugeza ubu muri ubu bubiko bivugwa ko hahiriyemo Transformateur, intsinga z’amashanyarazi nyinshi zifashishwaga mu gukwirakwiza umuriro w’amashanyarazi n’ibindi byinshi.