Perezida wa Leta Zunze Ubumwe za Amerika, Donald Trump, yasabye imitwe y’Abakurde bo muri Iran gukomeza igikorwa cyo kugaba ibitero kuri Leta ya Iran, mu gihe intambara iri hagati ya Iran n’ibihugu biyirwanya irimo kwaguka mu bice byinshi byo mu burasirazuba bwo hagati. Mu kiganiro Trump yagiranye n’ibiro ntaramakuru bya Reuters, yavuze ko ashyigikiye igitekerezo cy’uko ingabo z’Abakurde zikorera hafi y’umupaka wa Iran na Iraq zishobora kugaba ibitero ku nzego z’umutekano za Iran mu burengerazuba bw’icyo gihugu. Yagize ati: “Ntekereza ko ari igitekerezo cyiza cyane, kandi ndagishyigikiye.
” Ibi bibaye mu gihe Israel yatangaje ko yatangiye igikorwa kinini cyo kugaba ibitero ku bikorwaremezo bya gisirikare n’ibindi by’ingenzi mu murwa mukuru wa Iran, Tehran, mu gihe Iran nayo ikomeje kurasa misile n’indege zitagira abapilote ku bihugu byo mu karere. Mu minsi irindwi iyi intambara imaze, Iran yarashe misile n’indege zitagira abapilote igamije ibikorwa remezo bya Israel ndetse n’ibyo mu bihugu byo mu karere birimo Cyprus, Turkey na Azerbaijan. Intambara yanageze mu nyanja y’Ubuhinde hafi ya Sri Lanka, aho ubwato bw’intambara bwa Iran byavuzwe ko bwashwanyujwe n’ubwato bw’igisirikare cya Amerika.
Hagati aho, ubuyobozi bwa Azerbaijan bwatangaje ko bwiteguye gusubiza Iran nyuma y’uko indege zitagira abapilote enye ziturutse muri Iran zivugwa ko zinjiye ku butaka bwayo zigakomeretsa abantu bane mu gace ka Nakhchivan. Perezida Ilham Aliyev yavuze ko igihugu cye kitazihanganira icyo yise igitero cy’iterabwoba. Mu gihe ibi byose bibera mu karere, umutwe wa Hezbollah ushyigikiwe na Iran waburiye abaturage ba Israel gutura hafi y’umupaka na Lebanon kwimuka bakava mu ngo zabo, ugaragaza ko ushobora gusubiza ibitero bya Israel.
Ku rundi ruhande, Minisitiri w’Ingabo wa Amerika Pete Hegseth yatangaje ko nubwo intambara irimo gukaza umurego, Amerika itigeze yongera intego zayo za gisirikare muri Iran. Yavuze ko igikorwa cya gisirikare cyiswe Operation Epic Fury kigamije gusenya ubushobozi bwa Iran mu bya misile, inganda zikora izo misile ndetse n’ingabo zirwanira mu mazi, hagamijwe no gukumira Iran kugera ku ntwaro za kirimbuzi. Raporo zigaragaza ko ibitero byagabwe muri iyi ntambara byahitanye abantu benshi.
Umuryango utabara imbabare wa Iran wavuze ko abantu barenga 1,200 bamaze kwicwa, barimo abanyeshuri n’abarimu bapfiriye mu gitero cyagabwe ku ishuri mu mujyi wa Minab. Nubwo Perezida Trump yavuze ko Amerika igomba no kugira uruhare mu guhitamo uzasimbura umuyobozi wa Iran nyuma y’urupfu rwa Ali Khamenei, bamwe mu bayobozi ba Amerika bagaragaje ko intego nyamukuru ikiri ugusenya ubushobozi bwa gisirikare bwa Iran. Abasesenguzi bavuga ko iyi ntambara ishobora gukomeza kwaguka ikagira ingaruka zikomeye ku bukungu bw’isi, cyane cyane ku biciro by’ingufu nka peteroli na gaze, ndetse no ku bucuruzi n’ingendo zo mu kirere ku rwego mpuzamahanga.
