Umushumba Mukuru wa Authentic Word Ministries na Zion Temple Celebration Center, Apôtre Dr. Paul Gitwaza, yagaragaje ko mu myaka 32 ishize Jenoside yakorewe Abatutsi ihagaritswe, u Rwanda rumaze kugerwaho n’ibikorwa byinshi byiza by’Imana, anahumuriza abarokotse abasaba gukomeza gutwaza gitwari.
Umushumba Mukuru wa Authentic Word Ministries na Zion Temple Celebration Center, Apôtre Dr. Paul Gitwaza, yagaragaje ko mu myaka 32 ishize Jenoside yakorewe Abatutsi ihagaritswe, u Rwanda rumaze kugerwaho n’ibikorwa byinshi byiza by’Imana, anahumuriza abarokotse abasaba gukomeza gutwaza gitwari.
Ubu butumwa yabunyujije ku rubuga rwe rwa Instagram kuri uyu wa Kabiri tariki ya 7 Mata 2026, umunsi u Rwanda n’Isi yose batangiye icyumweru cy’icyunamo n’iminsi 100 yo kwibuka ku nshuro ya 32 Jenoside yakorewe Abatutsi mu 1994.
Mu butumwa bwe, Apôtre Gitwaza yifatanyije n’Abanyarwanda muri ibi bihe byo kwibuka, agaragaza ko nubwo imyaka ishize ari myinshi, ibikomere n’agahinda bikiri mu mitima ya benshi, cyane cyane abarokotse Jenoside.
Yagize ati: “Amahoro y’Imana abane namwe mwese. Jyewe n’umuryango wanjye hamwe n’amatorero yose ya Zion Temple Celebration Center twongeye kwifatanya n’Abanyarwanda muri iki gihe twibuka ku nshuro ya 32 Jenoside yakorewe Abatutsi mu 1994.”
Yakomeje asobanura ko iki gihe cyo kwibuka kiremereye ku mitima ya benshi, ariko ko ari n’umwanya wo kongera kwibutsa abafite intimba gukomeza kugira ibyiringiro.
Ati: “Iki gihe cyo kuzirikana amateka mabi u Rwanda rwaciyemo kiraremereye cyane, by’umwihariko ku barokotse Jenoside. Nubwo imyaka igenda ishira, ibikomere n’agahinda biracyagaragara.”
Yongeraho ati: “Uyu munsi nifuzaga kuguhumuriza wowe ugifite intimba, nkongera kukwibutsa nti: Komera, hari ejo heza kandi umugambi w’Imana ku buzima bwawe ni mwiza.”
Yifashishije ijambo ryo muri Bibiliya, Yeremiya 29:11, rigira riti: “Erega nzi ibyo nibwira nzabagirira! Ni amahoro si bibi, kugira ngo mbareme umutima w’ibyo muzabona hanyuma,” agaragaza ko Imana ifitiye buri wese umugambi mwiza n’icyizere cy’ejo hazaza.
Apôtre Gitwaza yanibukije abafite intimba ko badakwiye guheranwa n’agahinda, ahubwo bakwiye no kuzirikana ibyiza byagezweho mu myaka ishize Jenoside ihagaritswe, bagakomera ku byiringiro.
Yanagaragaje ko kwizera Kristo ari imwe mu nzira ifasha umuntu gukira ibikomere, asobanura ko “Kristo yikoreye imibabaro yacu akaduha amahoro.”
Mu gusoza ubutumwa bwe, yasengeye abarokotse Jenoside n’abandi bose bafite intimba, abasaba gukomeza kugira ibyiringiro no kwizera ko Imana ifite umugambi mwiza ku buzima bwabo n’imiryango yabo.
Yagize ati: “Komera, Imana igukize umubabaro wose. Wibuke wiyubaka kandi wubakwa n’Imana.”
