Leta ya Cross River yo mu gihugu cya Nigeria yatangaje ko yashyize mu kato abantu icumi bagaragayeho ibimenyetso bya COVID-19, nyuma y’uko ku wa 21 Mata 2026 bahuye n’Umushinwa wanduye iki cyorezo.
Umukozi ushinzwe kurwanya ibyorezo muri Cross River, Dr Inyang Ekpenyong, yahamije ko abo bantu babonetse binyuze mu gukurikirana agace ka Akamkpa, aho bahuriye n’uwo Mushinwa wanduye.
Abantu icumi ni bo bagaragaje ibimenyetso bya COVID-19. Inzego z’ubuzima zahise zibasaba kuguma mu ngo zabo kugira ngo birinde gukwirakwiza ubwandu mu bandi.
Yagize ati: “Twahagaritse ingendo zabo kugira ngo bagume mu ngo zabo, bityo badakwirakwiza ibyo bimenyetso mu bandi bantu. Naho uwo Mushinwa ari kwitabwaho n’abaganga mu Bitaro Byigisha bya Kaminuza bya Calabar (UCTH), kandi ari kugenda yoroherwa.”
Komiseri ushinzwe ubuzima muri iyi leta, Dr Henry Egbe Ayuk, yavuze ko hashyizweho ingamba zikomeye zo gukumira ikwirakwira ry’iyi virusi.
Ati: “COVID-19 ntabwo yibasiye Nigeria gusa, ariko twiyemeje kuyikumira. Nta mpamvu yo gukangarana.”
Ishami ry’Umuryango w’Abibumbye ryita ku Buzima (OMS) rivuga ko iki cyorezo cyahitanye abasaga miliyoni 7 ku isi hose kuva cyagaragara mu mwaka wa 2019, aho benshi mu bapfuye bayizize bakomoka muri Leta Zunze Ubumwe za Amerika, Brezil n’u Buhinde.
