U Burusiya bwatangaje ko budateze kongera igihe cy’agahenge ku ntambara buhanganyemo na Ukraine, kari kashyizweho mu gihe cya Pasika y’Aba-Orthodox, mu gihe Perezida wa Ukraine, Volodymyr Zelensky, ataragaragaza ubushake bwo kwemera ibyo busabwa n’i Moscow.
Mu byifuzo u Burusiya bwakunze kugaragaza harimo ko Ukraine igomba kureka bimwe mu bice byayo, kwirinda kujya mu muryango wa OTAN, kugabanya ingabo ndetse n’izindi ngingo zirebana n’umutekano.
Mu kiganiro cyatambutse ku wa 12 Mata 2026, Umuvugizi w’Ibiro bya Perezida w’u Burusiya, Dmitry Peskov, yavuze ko amahoro arambye ashoboka gusa igihe Ukraine yemeye ibyo igihugu cye gisaba.
Yagize ati, amahoro arambye ashobora kugerwaho igihe u Burusiya rubonye ibyo rushaka kandi rukagera ku ntego rwihaye kuva mu ntangiriro z’iyi ntambara. Yongeyeho ko ibyo bishoboka kugerwaho vuba, ariko bikaba bisaba ko Zelensky yemera ibisubizo bihari.
Yakomeje ashimangira ko mu gihe ibyo u Burusiya busaba bitakwemerwa, ibikorwa bya gisirikare bizakomeza nyuma y’uko igihe cy’agahenge kirangiye.
Ku rundi ruhande, Ukraine n’u Burusiya byakomeje gushinjanya kutubahiriza agahenge k’amasaha 32 kari kashyizweho mu gihe cya Pasika y’Aba-Orthodox, kuva ku wa Gatandatu nijoro kugeza ku Cyumweru nijoro.
Ingabo za Ukraine zatangaje ko u Burusiya bwarenze kuri ako gahenge inshuro zirenga 2.299 guhera mu gitondo cyo ku wa 12 Mata, zirimo ibitero 28, amasasu yarashwe inshuro 479 ndetse n’ibitero bya drones bigera ku 1.800.
Na ho u Burusiya, binyuze muri Minisiteri y’Ingabo yabwo, bwavuze ko na Ukraine yakoze ibikorwa byinshi byo kutubahiriza ako gahenge, bivugwa ko byarenze 2.000.
Ibi byose bikomeje kongera umwuka mubi hagati y’impande zombi, bikerekana ko amahirwe yo kugera ku mahoro arambye akiri kure.
