Ibiro bya Kremlin byashyize hanze ubutumwa bwa videwo Perezida Vladimir Putin yageneye abaturage b’Ubushinwa mbere y’uruzinduko rwe rutangira i Beijing.
Muri ubwo butumwa, Putin yashimangiye umubano ukomeye hagati y’Uburusiya n’Ubushinwa, ashimira Perezida Xi Jinping amwita “inshuti nziza y’igihe kirekire”. Yavuze kandi ko umubano hagati y’ibihugu byombi ugeze ku rwego rwo hejuru rutari rwigeze rubaho mbere.
Putin yavuze ko ubufatanye hagati y’ibi bihugu bifite uruhare rukomeye mu guteza imbere umutekano n’ituze ku rwego mpuzamahanga. Yagaragaje ko impande zombi zikomeje gukorana mu nzego zitandukanye zirimo ubukungu, politiki ndetse n’umutekano.
Uru ruzinduko rwa Putin rubaye nyuma y’iminsi mike Perezida Xi Jinping yakiriye Donald Trump mu Bushinwa, ibintu byakuruye impaka n’inyungu nyinshi mu rwego rwa dipolomasi mpuzamahanga.
Ku wa mbere, Kremlin yatangaje ko Uburusiya butegereje byinshi muri uru ruzinduko rw’iminsi ibiri, kandi ko ruzafasha mu kurushaho kubaka icyo impande zombi zita “ubufatanye budasanzwe”.
Ni uruzinduko rwa 25 Putin agiriye mu Bushinwa, ibintu bigaragaza umubano wa hafi uri hagati ya Moscow na Beijing. Nubwo ibihugu byo mu burengerazuba bw’isi bikomeje gusaba Ubushinwa gushyira igitutu ku Burusiya kugira ngo buhagarike intambara muri Ukraine, Ubushinwa bwo bukomeje kugaragaza ubushake bwo gukomeza umubano wabwo na Moscow.
