Kurangiza vuba mu gikorwa cyo gutera akabariro ni ikibazo gikunze kubaho ku bagabo benshi, kandi gishobora kugira ingaruka ku mubano w’abashakanye iyo kitabashije kuganirwaho no gushakirwa umuti mu bwumvikane. Si indwara ikomeye buri gihe, ahubwo akenshi biterwa n’ihahamuka, umunaniro, imihangayiko, cyangwa kubura ubunararibonye. Umugore afitemo uruhare runini mu gufasha umugabo we kugikemura, cyane cyane iyo habayeho gushyira mu ngiro amasezerano y’urukundo bafitanye, kwihangana n’imikoranire myiza.
Umugore ashobora gufasha umugabo we amuha ituze n’icyizere. Abagabo benshi barangiza vuba kubera ubwoba bwo kunanirwa gushimisha abo bashakanye. Iyo umugore yirinda kumushinja bimwe na bimwe, kumuseka cyangwa kumugaragariza ko atishimiye ibyakozwe, ahubwo akamwereka ko amwumva kandi amushyigikiye, bituma umugabo atuza mu mutwe bikagabanya igitutu gituma arangiza vuba.
Kuganira ku mibonano mpuzabitsina mu buryo bwubaka ni ingenzi. Umugore ashobora kuganira n’umugabo we ku byo yumva n’ibyo akenera, ariko akabikora atuje kandi mu magambo yuzuye ubwuzu. Ibiganiro byiza bituma bombi bumva ko ari abafatanyabikorwa, ko atari abacamanza cyangwa ari mu mikino wo guhangana no kwemezanya.
Ikindi, umugore ashobora gufasha umugabo afatanya na we mu gushyira umutima ku gihe kinini cy’urukundo mbere y’igikorwa nyir’izina (Gutegurana mu mutwe n’ahandi) . Kwita ku byiyumvo, kwerekana urukundo no gukomeza igihe cyo kwitegurira akabariro bifasha umugabo kugabanya kwihuta no kugenzura amarangamutima ye neza. Umugore ashobora gufasha umugabo we kumushishikariza kwita ku buzima bwe rusange.
Kuruhuka bihagije, kurya neza, kugabanya imihangayiko no kwirinda inzoga nyinshi n’ibindi bishobora guteza umunaniro bifasha umubiri gukora neza, bigatuma n’ikibazo cyo kurangiza vuba kigabanuka. Gufasha umugabo mwashakanye kutarangiza vuba bisaba urukundo, ubwumvikane n’ubufatanye hagati yanyu mwembi babiri. Iyo umugore abigizemo uruhare atuje, yihangana kandi ashishikajwe no kubaka umubano mwiza, bigira uruhare runini mu gukemura iki kibazo no kongera umunezero mu rugo.
Icy’ingenzi ni uko bombi bumva ko iki kibazo gishobora gukemurwa binyuze mu gukorana no kubahana. 
