Umunyamakuru ESTHER FIFI Uwizera ukorera
igitangazamakuru cya Radiyo na TV 10, mu butumwa yahaye Umunsi.com, yasabye
urubyiruko ndetse n’abandi bose gucana urumuri rw’icyizere n’urukundo barwanya
ingengabitekerezo ya Jenoside yakorewe abatutsi mu 1994.
ESTHER Fifi kandi
yasabye buri wese kuzirikana ababuze ababo muri Jenoside yakorewe abatutsi mu
1994 nk’amateka mabi yahekuye u Rwanda.
Yagize ati:”Muri ibi bihe byo kwibuka ku nshuro ya 32
Jenoside yakorewe Abatutsi mu 1994, turazirikana abacu twabuze, ubuzima bwabo
bwazimye mu buryo bw’agashinyaguro”.
“Twibuka imiryango yazimye burundu, ababyeyi biciwe
abana, n’abana basigaye ari imfubyi nyuma yo kubura ababyeyi babo. Ibyo byose
ni amateka adusigiye isomo rikomeye ryo gukomeza kubaho, kwiyubaka no
guharanira ubumwe”.
Yakomeje agira ati:”Ducane urumuri rw’urukundo
n’icyizere, turwanye ingengabitekerezo ya Jenoside n’abayikwirakwiza, twamagane
n’abigira ntibindeba batitaye ku kuri n’amateka yacu. Kongera kubaho ni bwo
butwari”.
ESTHER Fifi ni umwe mu banyamakuru babimazemo igihe kinini
akaba akorera igitangazamakuru cya Radiyo na TV10. Ubutumwa bwe muri ibi bihe
byo kwibuka ku nshuro ya 32 Jenoside yakorewe abatutsi mu 1994, bwakanguye
urubyiruko ndetse n’abandi bose bacyumva ko ntacyo bibabwiye cyangwa ba
ntibindeba nk’uko yabigaragaje.
Mu gihe cyo kwibuka Jenoside yakorewe abatutsi mu
1994, hatambutswa ubutumwa buba bukubiyemo inzira y’umusaraba uwarokotse aba
yaranyuzemo , ubwo butumwa bukaba bukwiriye gufatwa nk’amasomo akomeye atuma bitazongera
kubaho nk’uko Esca abivuga.
Ubutumwa bwa ESTHER Fifi kandi bushimangira ko hashobora
kuba hakiri ba ntibindeba , ari na bo bakwiriye kurwanywa kugira ngo ahabi u
Rwanda rwageze rutazahasubira abantu bakongera kwicwa bazira uko bavutse kandi
nyamara batariremye.
Jenoside yakorewe abatutsi mu 1994, ni isomo rikomeye
ku Isi by’umwihariko ikaba amateka mabi y’u Rwanda akwiriye kumenywa na buri
wese kugira ngo itazongera kubaho ukundi.
