Bitarenze mu Ukuboza 2026, biteganyijwe ko urubyiruko rwo muri Leta Zunze Ubumwe za Amerika rutazongera kwiyandikisha ku bushake rujya mu gisirikare, ahubwo hazifashishwa ikoranabuhanga ribashyira ku rutonde rw’abashobora kwinjira mu ngabo.
Ibi bivuze ko umuturage wujuje ibisabwa azajya ahita abarirwa mu bashobora kujya mu gisirikare atabanje kubyisabira, hanyuma igihe bibaye ngombwa akazahamagarwa.
Mbere y’izi mpinduka, abasore bafite hagati y’imyaka 18 na 25 basabwaga kwiyandikisha mu minsi 30, ariko hari abatajyaga babyubahiriza uko bikwiye. Ubu buryo bushya bugamije koroshya imikorere no kugabanya amafaranga yakoreshwaga mu bukangurambaga bwo gushishikariza urubyiruko kwiyandikisha.
Uyu mushinga uri gusuzumwa kandi ugomba kubanza kwemezwa mbere yo gushyirwa mu bikorwa. Watanzwe ku wa 30 Werurwe 2026 n’ikigo cya Selective Service System ku rwego rushinzwe kugenzura imikorere muri Amerika.
Muri Amerika, kutiyandikisha muri uru rwego bifatwa nk’icyaha gishobora gutuma umuntu afungwa cyangwa akabura amahirwe atandukanye nko kubona akazi ka Leta cyangwa ubufasha mu kwiga. Nubwo bimeze bityo, imibare yo mu 2024 yagaragaje ko abagera kuri 81% ari bo bari bubahirije iri tegeko.
Umuvugizi w’Ibiro bya Perezida, Karoline Leavitt, yavuze ko uyu mushinga atari uw’ako kanya kandi udafitanye isano n’intambara iyo ari yo yose, harimo n’icyo bamwe bakekaga kijyanye na Iran.
Yagize ati: “Si gahunda y’igihe gito, ahubwo ni uburyo igihugu gishobora guteganyiriza ejo hazaza. Perezida ahora ashyira imbere kurinda abaturage n’ingabo z’igihugu.”
Mu mateka ya Amerika, uburyo bwo guhamagara abasirikare ku gahato bwakoreshejwe inshuro nke cyane, kandi bwa nyuma bwagaragaye mu gihe cy’intambara ya Vietnam War, aho abarenga miliyoni 1.8 binjijwe mu gisirikare.
