Sanga:
Umuhanzi w’indirimbo zo kuramya no guhimbaza Imana, Josh Ishimwe, ari mu myiteguro yo kwerekeza mu Buholandi aho azakorera igitaramo cye cya mbere muri icyo gihugu. Iki gitaramo giteganyijwe ku wa 14 Gashyantare 2026, kikazabera mu Mujyi wa Spijkenisse, kikaba kigamije kwifatanya n’abatuye muri ako gace kwizihiza Umunsi Mpuzamahanga w’Abakundana, uzwi nka Saint Valentin. Mu kiganiro yatanze, Josh Ishimwe yasobanuye ko iki gitaramo kizaba ari intambwe ikomeye mu rugendo rwe rw’umuziki, kuko ari bwo bwa mbere agiye gutaramira mu Buholandi. Yagaragaje ko azishimira kwakira Abanyarwanda n’abandi baturutse mu bihugu bitandukanye byo mu Burayi birimo u Bubiligi, u Bufaransa, u Budage na Luxembourg. Yasobanuye kandi ko ari igitaramo kigamije gusangira ibyishimo n’urukundo, ariko cyane cyane gushimira Imana yabanye na bo mu bihe byashize. Umujyi wa Spijkenisse uherereye mu Burengerazuba bw’u Buholandi, mu Ntara ya South Holland, hafi cyane y’Umujyi wa Rotterdam. Ni umujyi utuwe n’abaturage barenga ibihumbi 70, ukaba ufite umwihariko wo kuba hafi y’uruzi rwa Nieuwe Maas, bigatuma uhuza ubucuruzi n’ingendo zo mu mazi. Kuba uri hafi ya Rotterdam, umwe mu mijyi ikomeye mu Buholandi, bituma Spijkenisse iba ahantu hateguwe neza ku bikorwa by’umuco n’imyidagaduro, ari na byo bizatuma igitaramo cya Josh Ishimwe cyitabirwa n’abantu benshi. Iki gitaramo gifite igisobanuro cyihariye kuri Josh Ishimwe, kuko kizaba kibaye nyuma y’igihe kitari kinini akoze ubukwe n’umugore we Gloria. Ubukwe bwabo bwabereye mu Buholandi ku wa 21 Kamena 2025, bikaba byaratumye iki gihugu kiba gifite umwanya wihariye mu buzima bwe. Byongeye, ababyeyi b’umugore we batuye mu Buholandi, kandi Josh Ishimwe ahafite n’abandi bo mu muryango, ari na byo byamufashije guhuza ibikorwa by’umuryango n’intego ze z’ubuhanzi. Umunsi wa Saint Valentin wizihizwa hirya no hino ku isi, ukaba uzwiho guteza imbere urukundo, ibyishimo n’ubusabane. Muri uwo munsi, hategurwa ibitaramo, iminsi mikuru n’ibindi bikorwa byihariye bigamije guhuza abantu. Mu Burayi, muri Amerika no muri Aziya, abahanzi bakomeye bakora ibitaramo by’imbonankubone, bigahuza abakunzi babo mu mwuka w’urukundo n’umunezero. Mu bihugu bitandukanye birimo u Bufaransa, u Butaliyani, Brazil, Japan na Leta Zunze Ubumwe za Amerika, Saint Valentin irangwa n’ibikorwa binyuranye nko kumurika impano, amarushanwa y’abakundana, amaserukiramuco y’urukundo ndetse no gusangira n’imiryango. Ibi byose bigaragaza uko uyu munsi ufite umwihariko mu mibereho y’abantu benshi ku isi, ari na byo Josh Ishimwe yifuza kwifatanyamo binyuze mu muziki we wo kuramya no guhimbaza Imana. https://youtu.be/6wyXbsU2yOI?list=RDsX0yFDVsjQU
