Karongi – Rugabano: Babangamiwe no kuba umuhanda ubageza kwa muganga udakoze

Abaturage bo mu Murenge wa Rugabano bavuga ko kuba umuhanda wa Gasenyi udakoze bituma babangamirwa n’ingendo by’umwihariko kubagana Ivuriro rya Gasenyi.

 

Aba baturage bavuga ko mu gihe cy’izuba umuhanda uba wuzuyemo umukungugu mwinshi naho mu gihe cy’imvura ukanyerera cyane byagera no mu mikingo n’ibinogo birimo bikaba ikibazo ku binyabiziga.

 

Uwo twahaye izina rya Kamali usanzwe agenda muri uwo muhanda yagize ati:”Turasaba ko uyu muhanda wakorwa , ahari ibinogo bigakurwamo ndetse byaba byiza bakadufasha gushyiramo umucanga utazana ivumbi ryinshi kuko iyo ari mu gihe cy’izuba ribangama byagera no mu mvura ukanyerera n’icyondo ki kaba cyinshi ibinyabiziga bikabangamirwa”.

 

Undi yagize ati:”Ubundi muri Rugabano hakabaye Umujyi kuko hari uruganda rw’icyayi, hari amashuri ya Rugabano hari Ivuriro n’ibindi ariko uyu muhanda ni mubi. Utuma imodoka zitagenda neza kubera imikuku irimo noneho byagera mu gihe cy’imvura bikaba akarusho”.

 

Uwo twahawe izina rya Karima yagaragaje ko kuba uwo muhanda umeze gutyo bituma ibiciro bizamuka by’umwihariko kuri moto na we agasaba ko uwo bafashwa ugakorwa.

 

Yagize ati:”Ibiciro by’indgendo birazamuka kubera uburyo umuhanda umeze, aho bakaguciye 500 RWF baguca 1000 RWF. Ku muturage uri aha, aba agorwa cyane pe. Ni umuhanda n’ubuyobozi bunyuramo barawuzi. Turasaba ko wakorwa”.

 

Umunyamabanga Nshingwabikorwa w’Umurenge wa Rugabano Ngendahimana Jean Damascene yabwiye Imvaho Nshya ko ikibazo cyo kwangirika k’uwo muhanda bakizi ndetse ko bagiye gushyira imbere ibikorwa by’umuganda biwusana mu rwego rwo gufasha abawugenda gusa yizeza abaturage ko mu Kwezi gutaha uzaba umeze neza.

 

Yagize ati”Gahunda yo gukora uwo muhanda irahari kandi mu buryo bwo kwishakamo ibisubizo, tugiye gushyira imbere imiganda izajya isiba ahantu hameze nabi ku buryo abantu bagenda. Abaturage twabasezeranya ko mu Kwezi kwa Nzeri tuzakora imiganda hanyuma ibindi bizajya bigenda bikorwa uko ubushobozi buzajya bugenda buboneka”.

 

Umuhanda abaturage bifuza ko ukorwa uri hagati y’ibirometero 6 na 18, by’umwihariko umuhanda wa Rugabano Gasenyi ho mu Karere ka Karongi  mu Ntara y’Iburengerazuba.