Mary Jo "MJ" Shannon, nyina wa Kris Jenner ndetse akaba umwe mu bantu bazwi cyane mu muryango wa Kardashian-Jenner, yitabye Imana ku wa Kane tariki ya 16 Nyakanga 2026 afite imyaka 91.
Inkuru y'urupfu rwe yatangajwe na Kris Jenner abinyujije ku mbuga nkoranyambaga, aho yavuze ko nyina yari "umutima w'umuryango" kandi ko ari we wamwigishije gukunda umuryango, kugira neza no guhangana n'ibigeragezo.
Mu butumwa bwe bwuzuyemo agahinda, Kris Jenner yavuze ko nta magambo yasobanura agaciro nyina yari afite mu buzima bwe, amushimira uburyo yamutoje gukunda umuryango nta buryarya no guha agaciro buri mwanya bamaranaga.
Yagize ati: "Uyu munsi twasezeye ku mubyeyi wanjye mwiza, MJ. Yari umutima w'umuryango wacu. Yanyigishije ko umuryango ari wo wa mbere, ko tugomba gukunda abo dukunda tubikuye ku mutima no kutigera dufata igihe tumarana nk'aho gisanzwe."
Mary Jo Shannon yavukiye muri Leta ya Arkansas muri Leta Zunze Ubumwe za Amerika ku wa 26 Nyakanga 1934, yitwa Mary Jo Campbell mbere yo gushyingirwa.
Yashatse bwa mbere Robert "Bob" Houghton mu 1954, babyarana Kris Jenner mu 1955. Nyuma yo gutandukana na Bob, yashakanye n'umucuruzi Harry Shannon, wabaye nk'umubyeyi wa Kris Jenner n'umuvandimwe we Karen Houghton kugeza apfuye mu 2003.
MJ Shannon yari azwi cyane mu biganiro bya televiziyo Keeping Up With the Kardashians na The Kardashians, aho yakundwaga kubera urwenya rwe, ubunararibonye ndetse n'uruhare rwe mu muryango wa Kardashian-Jenner.
Uretse kuba yaragaragaraga kuri televiziyo, yanigeze gutunga iduka ricuruza imyambaro y'abana mu Mujyi wa San Diego.
Mary Jo Shannon yanabaye intangarugero mu guhangana n'uburwayi, kuko yigeze gukira kanseri y'ibere na kanseri yo mu mara. Icyateye urupfu rwe ntikiratangazwa.
Asize umukobwa we Kris Jenner, umwuzukuru we Natalie Zettel, ndetse n'abuzukuru batandatu bazwi ku rwego mpuzamahanga ari bo Kourtney Kardashian, Kim Kardashian, Khloé Kardashian, Rob Kardashian, Kendall Jenner na Kylie Jenner.
