Urwego rw’Igihugu rw’Ubugenzacyaha, Rwanda Investigation Bureau, rwatangaje ko rwataye muri yombi Eric Semuhungu, gusa ntirwatangaje ibyo akurikiranyweho mu rwego rwo kutabangamira iperereza.
Umuvugizi wa RIB, Thierry Murangira, yavuze ko iperereza rigikomeje, bityo ko amakuru arambuye azatangazwa nyuma.
Ati: “Ni byo koko Eric Semuhungu yarafashwe. Icyakora kugira ngo bitabangamira iperereza nta byinshi twatangaza. Ibyo iperereza ry’ibanze rizagaragaza tuzabibatangariza.”
Semuhungu yafashwe tariki ya 9 Mata 2026, akaba afungiye kuri sitasiyo ya RIB i Kimironko.
Uyu mugabo yamenyekanye cyane mu 2016 ubwo hasakazwaga amafoto ku mbuga nkoranyambaga agaragaza ubuzima bwe bwite. Yaje kongera kuvugwa mu 2024 ubwo yoherezwaga mu Rwanda avanywe muri United States, aho yari akurikiranyweho ibyaha bitandukanye birimo gusambanya abana.
Iperereza ku byaha akekwaho muri iki gihe riracyakomeje, inzego zibishinzwe zikavuga ko amakuru arambuye azatangazwa mu gihe kiri imbere.
