Mani Martin uri mu rugendo rw’ibitaramo n’ibikorwa byo kumurika Album ye nshya Rebirth mu Buyapani, yatangaje ko yagiranye ibiganiro n’Ambasaderi w’u Rwanda muri iki gihugu, Mukasine Marie Claire, anashimira uburyo yamwakiriye n’uburyo yakomeje kumutera imbaraga muri uru rugendo.
Mu butumwa yashyize kuri konti ye ya Instagram kuri uyu wa Kane tariki 16 Nyakanga 2026, Mani Martin yavuze ko ubwo yavaga mu Ntara ya Miyazaki yerekeza i Fukushima, yabonye umwanya wo guhura n’uyu mudipolomate w’u Rwanda.
Yagize ati: "Mu rugendo rwanjye nvuye muri Miyazaki mu majyepfo y’u Buyapani njya i Fukushima mu majyaruguru y’iki gihugu, nagize amahirwe yo gusuhuza Nyakubahwa Marie Claire Mukasine, Ambasaderi w’u Rwanda mu Buyapani. Ndashimira cyane uburyo yankiriye neza n’umugisha w’u Rwanda yansangije muri icyo gihe twagiranye."
Aya magambo agaragaza ko Mani Martin afata uru rugendo nk’ururenze ibitaramo gusa, ahubwo ko ari n’umwanya wo gukomeza kubaka umubano n’Abanyarwanda batuye cyangwa bahagarariye igihugu mu mahanga, ndetse no gukomeza kumenyekanisha umuco n’umuziki nyarwanda ku rwego mpuzamahanga.
Ibi biganiro bibaye nyuma y’igitaramo Mani Martin yakoreye muri Miyazaki International University ku wa 11 Nyakanga 2026. Iki gitaramo cyabereye mu nyubako y’Ikigo Mpuzamahanga cy’Ubusabane (International Exchange Center), cyitabirwa n’abanyeshuri, abarimu ndetse n’ababyeyi bagize umuryango mugari w’iyi kaminuza.
Miyazaki International University ni kaminuza yigenga yashinzwe mu 1994, izwiho gutanga uburezi bushingiye ku ndangagaciro zirimo kubaha abandi, umurimo n’ubufatanye mpuzamahanga. Yigisha amasomo menshi mu Cyongereza kandi ikakira abarimu n’abanyeshuri baturutse mu bihugu bitandukanye, ibintu byayigize kimwe mu bigo byigisha bifite isura mpuzamahanga mu Buyapani.
Ni kaminuza kandi ishyira imbere ibikorwa byo kungurana ibitekerezo no kubaka umubano hagati y’Abayapani n’abaturuka mu bindi bihugu, ari na yo mpamvu igitaramo cya Mani Martin cyafashwe nk’umwanya mwiza wo guhuza umuziki n’umuco.
Mu rugendo arimo, Mani Martin akomeje gusobanura ubutumwa bukubiye muri Album ye Rebirth, avuga ko ari umushinga wavutse nyuma y’igihe kinini cyo kwisuzuma no kongera kubaka ubuzima bwe.
Uyu muhanzi avuga ko yigeze gufata umwanya wo kuva mu buzima bwo guhora ari mu ruhame no mu bikorwa byinshi, kugira ngo abanze yisobanukirwe neza, akire ibikomere yanyuzemo kuva mu bwana, ndetse yongere kubona amahoro yo mu mutima.
Kuri we, Rebirth ntabwo ari Album y’indirimbo gusa, ahubwo ni inkuru y’ubuzima bwe. Ni ubutumwa bushishikariza abantu kwemera amateka yabo, gukira ibikomere, kwiyakira no kongera kubaka icyizere cy’ejo hazaza.
Mani Martin avuga ko mu rugendo rwe rw’umuziki no mu buzima yagiye afashwa n’abantu batandukanye. Mu bo ashimira harimo Rev. Antoine Rutayisire, wamubaye hafi akiri umwana utangiye kuririmba.
Nyuma y’imyaka myinshi bongeye guhura, Mani Martin yavuze ko bagiranye ibiganiro byamufashije gusobanukirwa ko ubuzima bwuzuye butangirira imbere mu muntu. Yungutse isomo ry’uko amahoro nyakuri atagerwaho umuntu agifite imitwaro y’ibyahise, ahubwo ko bisaba kwemera gukira no kurekura ibimuremereye.
Ni imwe mu mpamvu avuga ko ubutumwa bwa *Rebirth* bwubakiye ku kongera kuvuka mu mitekerereze no mu mibereho.
Uretse kuba ari umuhanzi, Mani Martin yanitabiriye gahunda zitandukanye mpuzamahanga zamwongereye ubumenyi ku miyoborere, ubuyobozi bushingiye ku ndangagaciro no gukorera abandi.
Yabaye umwe mu bitabiriye gahunda ya Dalai Lama Fellowship muri Kaminuza ya Virginia muri Leta Zunze Ubumwe za Amerika, aho yize uburyo umuntu ashobora kuyobora no gukorera abandi akoresheje impuhwe, ubushishozi n’indangagaciro z’ubumuntu.
Yanabaye umushakashatsi wungirije mu mushinga wa Japan International Cooperation Agency (JICA) ku burezi n’imikurire y’abana bato mu Rwanda. Uwo mushinga wamwegereje ubuzima bw’abaturage bo mu byaro ndetse umufasha kumva neza inkuru n’ibibazo by’abana b’Abanyarwanda.
Nyuma yaho yongeye kwitabira gahunda ya Art Rwanda Ubuhanzi ya Imbuto Foundation, aho yahuriye n’abandi bahanzi batandukanye, ibikorwa bye bikomeza kwaguka ndetse n’urugendo rwe rw’ubuhanzi rufata indi ntera.
Uru rugendo ari kugirira mu Buyapani rukomeje kuba urwo kumenyekanisha Album *Rebirth*, ariko nanone rukaba amahirwe yo gukomeza kugaragaza umuziki nyarwanda ku ruhando mpuzamahanga no gukomeza kubaka umubano n’abafatanyabikorwa batandukanye barimo n’abahagarariye u Rwanda mu mahanga.
