Umuhanzi nyarwanda The Ben amaze iminsi ari mu bitaro nyuma yo kurembywa n’uburwayi bwamufashe mu mpera z’icyumweru gishize.
Amakuru aturuka ku nshuti ze za hafi avuga ko yatangiye kugaragaza ibimenyetso byo kutamererwa neza ku Cyumweru, ariko mu masaha y’ijoro ubuzima bwe burushaho kuzamba. Byabaye ngombwa ko ajyanwa kwa muganga mu rukerera rwo ku wa Mbere.
Mbere y’uko arwara, The Ben yari kumwe na mugenzi we Bruce Melodie, basuye Kigali Genocide Memorial ku Gisozi ku Cyumweru tariki ya 13 Mata 2026. Gusa, nyuma yo kumva atameze neza, yahise atandukana n’abo bari kumwe kare kugira ngo ajye kuruhuka.
Nyuma yaho, uburwayi bwe bwakomeje kwiyongera mu ijoro, kugeza ubwo ajyanywe kwa muganga. Kugeza ubu, ari kwitabwaho n’abaganga mu bitaro bya Kanombe Military Hospital, ariko ntiharamenyekana neza indwara arwaye.
Ibi bibaye mu gihe The Ben yari mu myiteguro y’ibitaramo azahuriramo na Bruce Melodie, byari biteganyijwe kuzenguruka imijyi ine y’u Rwanda.
Ni ibitaramo byagombaga gukurikira igitaramo gikomeye yise The New Year Groove yakoreye muri BK Arena ku wa 1 Mutarama 2026. Abakunzi be bakomeje kumwifuriza gukira vuba.
Isoko: Igihe
