Perezida wa Nigeria, Bola Ahmed Tinubu, yifurije umugore we, First Lady Oluremi Tinubu, isabukuru nziza y’imyaka 66, amushimira kuba yaramubaye hafi mu bihe bitandukanye by’ubuzima bwe ndetse amwita “inshuti nyakuri n’umujyanama we.”
Oluremi Tinubu yizihije isabukuru y’imyaka 66 kuri uyu wa 21 Nzeri 2026, aho Perezida Tinubu yamwandikiye ubutumwa bwihariye bwo kumushimira ku rugendo bamazemo imyaka myinshi.
Mu butumwa bwashyizwe ahagaragara n’Ibiro bya Perezida wa Nigeria, Tinubu yavuze ko Oluremi yamufashije mu bihe bikomeye kandi akamuba hafi igihe yari ahuye n’imbogamizi, akamugira inama akanamusengera.Yamushimiye kandi kuba amubwira ukuri n’igihe ari ibintu adashaka kumva, avuga ko ari imwe mu mpamvu amufata nk’inshuti ye magara ndetse n'umujyanama we mu gufata imyanzuro.
Perezida Tinubu yavuze ko bibayeho ubuzima bugasubira inyuma ku ntangiriro, yahitamo kongera kunyura mu nzira yamugejeje kuri Oluremi. Yagaragaje ko imyaka bamaze babana yaranzwe n’ibyishimo, gusengera hamwe, gufata imyanzuro igoye no kwihanganira ibihe bitandukanye.
Tinubu yavuze ko urugo rwabo rufite uruhare runini mu buzima bwabo, ashimira Oluremi ku buryo yareze abana babo ndetse n’abuzukuru kandi akabatoza indangagaciro zirimo kwizera no kugira umutima ugirira abandi ineza.Yasoje musaba Imana kumuha indi myaka myinshi imbere, ubuzima bwiza n’ibyishimo, avuga ko yifuza ko imyaka iri imbere yamuzanira ihumure n’umunezero nk’ibyo yahaye umuryango we n’abandi bantu.
Mu butumwa bwe, Tinubu yanagarutse ku bikorwa bya Oluremi byo gufasha abantu batandukanye muri Nigeria.
Yavuze ko kuva mu gihe yari First Lady wa Lagos State, ubwo yari afatanyije na we mu buzima bwa politiki muri uwo mujyi, kugeza ku bikorwa bya Renewed Hope Initiative (RHI) muri iki gihe, Oluremi yagiye yibanda ku gufasha abana, abagore, abapfakazi, abasaza, n’abandi bose bari babayeho mu buzima bugoye.
Perezida Tinubu yavuze kandi ko Oluremi yakomeje gushyigikira abantu bafite uburwayi butandukanye, harimo abarwaye igituntu (tuberculosis), ndetse akagira uruhare mu bikorwa by’ubuzima n’imibereho myiza y’abaturage.Ku munsi w’isabukuru ye, First Lady Oluremi Tinubu yakomeje kwakira ubutumwa bwo kumwifuriza isabukuru nziza.
Perezida w’ishyaka APC, Nentawe Yilwatda, yamushimiye ibikorwa bya Renewed Hope Initiative, cyane cyane ibijyanye n’uburezi, ubuzima, kongerera ubushobozi abagore n’urubyiruko ndetse no gufasha abatishoboye.Abandi bayobozi n’imiryango itandukanye muri Nigeria na bo bamwifurije isabukuru nziza, bamugarukaho nk’umuntu wagize uruhare mu bikorwa bigamije gufasha abagore, abana n’abandi baturage bafite intege nke.
Oluremi Tinubu yabaye First Lady wa Nigeria kuva Perezida Bola Tinubu yajya ku butegetsi mu mwaka wa 2023, nyuma yo kuba yarigeze kuba First Lady wa Lagos State ndetse akamara imyaka itatu ari Senateri uhagarariye Lagos Central muri Sena ya Nigeria.
